Афғонистондаги қарама-қаршиликларни тинч йўл билан тартибга солувчи ягона ҳужжат ҳозирча 1999 йил қабул қилинган Тошкент декларация бўлиб турибди.

Мазкур декларация пойтахтимизда “6+2” форматида ўтказилган учрашув якунида имзоланганди. Ушбу ҳужжат расмий мақомга эга ҳисобланиб, уни Афғонистондаги ички кучлар қабул қилган ва унинг шартларига рози бўлган ҳамда БМТ томонидан маъқулланган. Бу ҳақида Президент ҳузуридаги Стратегик ва минтақалараро тадқиқотлар институти директори Владимир Норов айтиб ўтди. 

Келгуси ҳафта бўлиб ўтадиган халқаро конференция якунлари бўйича декларация лойиҳаси 25 мартга қадар тайёрланади. 

В.Норовнинг қайд этишича, Афғонистон ўз тарихида кескинликнинг уч босқичини бошидан ўтказган.

Биринчи босқич совет қўшини контингентини олиб чиқиб кетилиши билан боғлиқ. Иккинчиси “Толибон” ҳаракатининг пайдо бўлиши ва ҳокимиятни эгаллашига бориб тақалади. Учинчиси 2001 йилда АҚШнинг Нью-Йорк ва Вашингтон шаҳарларида амалга оширилган террорчилик ҳаракатларидан сўнг бошланган.