АҚШнинг Калифорния штатида навбатдаги профессионал бокс турнири бўлиб ўтди. Мазкур оқшом Ўзбекистон бокс мухлислари учун муҳим аҳамият касб этиб, унда ҳаваскор боксда жаҳон чемпиони бўлган, «Париж-2024»да омади келмаган Руслан Абдуллаев ўзининг профессионал боксдаги дебют жангига чиқди.

Ҳамюртимиз ўзининг илк жангини мексикалик тажрибали боксчи Хосе Валензуела Алварадага қарши ўтказди. Баҳс жуда юқори темпда бошланди ва иккинчи раунддаёқ Абдуллаев рақибини кучли зарба орқали техник нокаутга учратди. Бу ғалаба ўзбек чарм қўлқоп устаси учун профессионал рингдаги муваффақиятли старт бўлди.

36 ёшли Хосе Валензуела Алварада проф боксда тажрибали рақиблардан бири саналади. У шу кунгача 23 та жанг ўтказган бўлиб, уларнинг учтасида ғалаба қозонган, 19 та баҳсда мағлуб бўлган ва битта жангини дуранг билан якунлаган. Шунга қарамай, Руслан Абдуллаев уни катта устунлик билан мағлуб этиб, ўзининг профессионал боксдаги имкониятларини кўрсатди.

Баҳс давомида Руслан Абдуллаевни ринг четида ўзбекистонлик машҳур боксчилар – Муроджон Аҳмадалиев ва Бектемир Мелиқўзиев қўллаб-қувватлаб туришди. Улар Русланнинг биринчи жангини яқиндан кузатиб боришди ва унга ишонч билдиришди.

Руслан Абдуллаевнинг профессионал боксдаги дебюти жуда муваффақиятли бошланди. Эндиликда мухлислар унинг келгуси жангларини янада кучли рақибларга қарши бўлишига ишонч билдиришмоқда.