Олимлар мултипл склероз (бу марказий нерв тизимига (мия ва умуртқа поғонасига) таъсир қилувчи аутоиммун касаллик бўлиб, унда иммун тизими асаб толаларини қопловчи миелин пардасига ҳужум қилади – таҳр.) касаллигига чалинган беморлар устидан олиб борилган тадқиқотда балиқ истеъмоли касалликнинг асоратларини камайтириши мумкинлигини аниқлашди.

Швецияда 15 йил давомида ўтказилган тадқиқот натижаларига кўра, мойли ва мойсиз балиқни кўпроқ истеъмол қилган беморларда ногиронлик даражаси секинроқ ўсган.

Тадқиқотда 2 минг 719 нафар бемор иштирок этган бўлиб, уларнинг рационлари ва касаллик ривожланиши кузатилган. Балиқни доимий равишда истеъмол қилган беморларда ногиронлик хавфи 44% га камайган. Балиқ истеъмолини ташхисдан кейин ҳам оширганлар учун ижобий натижалар қайд этилган – уларда ҳам асоратлар камроқ кузатилган.

Олимларнинг фикрича, балиқ таркибидаги омега-3 ёғ кислоталари ва таврин моддалари яллиғланишга қарши ва асаб ҳужайраларини ҳимоя қилувчи хусусиятларга эга. Улар мултипл склероз касаллиги билан боғлиқ зарарларни камайтириб, беморларнинг аҳволини яхшилашга ёрдам бериши мумкин.

Тадқиқотчилар балиқ истеъмолининг аҳамиятини янада чуқурроқ ўрганиш зарурлигини таъкидлашмоқда. Шунга қарамасдан, дастлабки натижалар балиқ рационини кўпайтириш мултипл склероз даволаш жараёнида қўшимча фойда келтириши мумкинлигини кўрсатяпти.