«Халқ сўзи»нинг расмий сайтида эълон қилинган танқидий мақолада айтилган камчиликларни бартараф этиш чоғида Бухородаги қадимий қабрдан китоблар топилди. Мутахассислар уларни ўрганиб чиқишмоқда.

Шу йилнинг 23 февралида сайтимизда «Қадимий қабр ёнидаги ҳожатхона ёхуд манқуртликнинг бир кўриниши» сарлавҳали танқидий-таҳлилий мақола эълон қилинган эди. Хабар берганимиздек, шундан сўнг вилоят ҳокимининг ўринбосари, Бухоро шаҳар ҳокими ва бошқа тегишли ташкилотлар масъуллари ҳолатни жойига бориб ўрганишди. 30-мактабгача таълим ташкилоти ҳудудида қолган қадимий қабр ёнидаги ҳожатхона бузиб ташланди.

— Ўрганиш натижасида қабрнинг устки қисмида араб ёзувидаги китоб қолдиқлари борлиги ва уларнинг консервацияга муҳтожлиги аниқланди, — дея хабар берди мухбиримизга вилоят маданий мерос бошқармаси раҳбари Шерзод Маҳмудов. — Улар ҳар томонлама чуқур ўрганилиши учун Бухоро давлат музей-қўриқхонасига топширилди.

Ўз навбатида биз ушбу топилма ҳақида маълумот олиш учун музей- қўриқхонада бўлдик.

— Кўриб турганингиздек, китоб варақлари моғорлаган. Даставвал уларни тозалаймиз, — дейди музей-қўриқхона масъул ходими Машҳура Ҳафизова. — Кейин реставрация қилинади. Бизнинг асосий вазифамиз уларни борича сақлаб қолиш. Кейин мутахассисларимиз ўрганиб чиқишади.

— Топилма орасида асосан Қуръон китоби саҳифалари ва луғат варақлари, шунингдек, тарихий аҳамиятга эга ҳужжат бор, — дейди музей-қўриқхонанинг ҳужжатлар бўлими илмий ходими Аҳтам Аҳмедов. — Тош босма усулдаги бу китобларни ҳозирча ХIХ аср охири, XХ аср бошларида Қозонда чоп этилган дея тахмин қилиш мумкин. Фондимизда мавжудлари билан солиштирган ҳолда ушбу луғат кимга тегишли, ким томонидан тайёрлангани каби саволларга тез орада жавоб топамиз. Китобларнинг варақлари ва ҳужжат музей- қўриқхона экспонатлари сифатида кўз қорачиғидай асралади.

Музей-қўриқхона директорининг илмий ишлар бўйича ўринбосари Жамшид Халиловнинг билдиришича, масканда айни дамда 134 минг 335 та экспонат бор. Уларнинг 7 мингтасини араб ёзуви ва тош босма усулидаги қўлёзмалар ташкил этади. Эндиликда қадимий қабр устки қисмидан топилган китобларнинг варақлари ҳам улар қаторидан ўрин олади.

Истам ИБРОҲИМОВ, («Халқ сўзи»)