Хорижий тил бўйича ишга қабул қилишда ҳамда устама белгилашда қўлланиладиган сертификатларнинг рўйхати янгиланди. Бу ҳақида «Таълим назорати» Telegram-канали хабар берди.

Унда айтилишича, таълим вазирликларининг 2025 йил 6 октябрдаги қарори (рўйхат рақами 3515-1) билан умумий ўрта, ўрта махсус, профессионал таълим тизимига хорижий тил бўйича ишга қабул қилишда ҳамда мактабгача, умумий ўрта, ўрта махсус, профессионал таълим тизимида фаолият юритаётган педагог ходимларга устама белгилашда қўлланиладиган хорижий тилларни билиш даражасини белгиловчи миллий ва халқаро сертификатлар рўйхатига ўзгартиришлар киритилган.

Ундаги асосий ўзгаришлар шундан иборатки, умумий ўрта, ўрта махсус ва профессионал таълим учун алоҳида, олий таълим тизими учун алоҳида рўйхат белгиланган.

Жумладан, «Test of English as a Foreign Language (TOEFL iTP)» халқаро сертификати асосий сертификатлар рўйхатидан чиқарилди. «International Test of English Proficiency iTEP Academic — Plus (B2-C2)», «Aptis ESOL for Teachers (B2-C1)» сертификатлари эса қўшилган.

Инглиз тили доирасида «Cambridge Assessment English (KET, PET, FCE, CAE, CPE)» сертификати номи «Cambridge English Qualifications (B2-C2)» деб ўзгартирилган.

Шунингдек, немис тилидан «TELC (Deustch B2-C2)» сертификати ҳам қабул қилинадиган бўлди.

Эслатиб ўтамиз, умумий ўрта, ўрта махсус, профессионал таълим муассасаларида фаолият юритаётган педагоглардан «Teaching Knowledge Test (TKT)», «Teaching English for Speakers of Other Languages (TESOL)», «Teaching English as a Foreign Language (TEFL)», «Teaching English as a Second Language (TESL)» сертификатлари «Common European Framework of Reference (CEFR)» тизимининг B2 ёки ундан юқори даражадаги сертификат билан биргаликда қабул қилинади ва уларга устама белгиланган тартибда тўланади.

Барча «Teaching English for Speakers of Other Languages (TESOL)», «Teaching English as a Foreign Language (TEFL)», «Teaching English as a Second Language (TESL)» сертификатлари ўқитувчи (тренер) билан камида 100 контакт соат шуғулланиши ва камида 40 соатлик ўқитувчи-педагогик амалиётини қамраб олиши, бунда амалиёт қисми инструктор томонидан кузатилиб баҳоланиши шарт.