Фото: Reuters

АҚШ Россия билан Украинадаги можарони Исроилнинг Иордан дарёсининг ғарбий соҳилида назорати асосида тартибга солиш таклифини муҳокама қилади. Бу ҳақда АҚШ Миллий хавфсизлик кенгашидаги манбага таяниб, «The Times» нашри хабар берди.

«Бу Исроилнинг Ғарбий Соҳилни қандай назорат қилаётганига ўхшаб кетади. Украина ҳеч қачон ўз суверенитетидан воз кечмайди. Лекин ҳақиқат шуки, у босиб олинган ҳудуд бўлади ва бу Фаластиннинг намунаси бўлади», — дейилади манбада.

Нашрнинг қайд этишича, ушбу таклифга кўра, Россия босиб олинган ҳудудларда ҳарбий ва иқтисодий назоратни амалга оширади. Бироқ Украина чегаралари де-юре ўзгармайди, худди Фаластин чегаралари Исроилнинг Ғарбий соҳилда назорати остида бўлишига қарамай, ўзгаришсиз қолиши каби.

Бу фикрни АҚШ президентининг элчиси Стив Уиткофф бир неча ҳафта аввал россиялик ҳамкасблари билан музокаралари чоғида айтган.

Аввалроқ, АҚШ президенти Дональд Трамп Россия етакчиси Владимир Путин билан жума куни Аляскада бўлиб ўтадиган учрашувида Украинада ўт очишни тўхтатиш бўйича келишувга эришилмаса, Россия АҚШ томонидан «жуда жиддий оқибатларга» дуч келишини айтган эди.