Foto: Yunus Boʻriyev/“Xalq soʻzi”

Oliy Majlis Senatining oʻninchi yalpi majlisida “Oʻzbekiston Respublikasining ayrim qonun hujjatlariga oʻzgartirish va qoʻshimchalar kiritish toʻgʻrisida”gi Qonun muhokama qilindi.

​

Maʼlumki, mamlakatimizda soʻnggi yillarda jismoniy va yuridik shaxslarning huquqlari hamda qonuniy manfaatlarini ishonchli himoya qilishga qaratilgan izchil islohotlar amalga oshirilmoqda.

​

Norma ijodkorligi faoliyatida huquqiy boʻshliqlarni toʻldirish yuzasidan aniq chora-tadbirlar belgilangan hamda huquqni qoʻllash amaliyotining bir xilligini taʼminlashga ham alohida eʼtibor qaratilib kelinmoqda.

​

Shu bilan birga, senatorlar huquqni qoʻllashda yagona amaliyotni taʼminlashga toʻsqinlik qiluvchi, korrupsiyaviy xavf-xatarlarni keltirib chiqaruvchi hamda aholi va tadbirkorlarning ortiqcha sarson boʻlishiga sabab boʻlgan ayrim normalarni huquqiy jihatdan tartibga solish zarurati yuzaga kelayotganligini alohida taʼkidlab oʻtdi.

​

Mazkur Qonun bilan 12 ta qonun hujjatiga, xususan, “Litsenziyalash, ruxsat berish va xabardor qilish tartib-taomillari toʻgʻrisida”gi, “Davlat boji toʻgʻrisida”gi, “Maktabgacha taʼlim va tarbiya toʻgʻrisida”gi, “Taʼlim toʻgʻrisida”gi, “Aholi bandligi toʻgʻrisida”gi Oʻzbekiston Respublikasi Qonunlari hamda Soliq kodeksiga oʻzgartirish va qoʻshimchalar kiritish nazarda tutilgan.

​

Senatorlar oʻz chiqishlarida ushbu Qonun jismoniy va yuridik shaxslarning huquqlari hamda qonuniy manfaatlari samarali himoya qilinishini taʼminlashga va korrupsiyaviy xavf-xatarlarni bartaraf etishga xizmat qilishiga eʼtibor qaratdi.

Muhokama yakunida Qonun senatorlar tomonidan maʼqullandi.

Yunus Boʻriyev (foto), Otabek Saidahmadov

“Xalq soʻzi”