Foto: Yonhap News

Janubiy Koreya yangi prezidenti Li Chje Myon rasman lavozimiga kirishdi. U oʻz inauguratsiya nutqida mamlakatdagi boʻlinishni bartaraf etish, iqtisodiyotni jonlantirish va milliy manfaatlarga asoslangan amaliy diplomatiya olib borishga vaʼda berdi. Bu haqda “Yonhap” agentligi xabar berdi.

Li Chje Myon prezidentlik saylovida gʻalaba qozonganidan soʻng, oʻz besh yillik muddatini oʻsha kunning oʻzida, oʻtish davrisiz boshladi. Bu saylov sobiq prezident Yun Sok Yolning dekabr oyidagi harbiy holat eʼlon qilishga urinishidan keyingi impichmenti sababli tashkil etilgan edi.

Inauguratsiya marosimi Seuldagi Milliy Assambleyada soddalashgan tarzda oʻtkazildi. Unda barcha fuqarolarni birdek qamrab oluvchi prezident boʻlishini bildirgan Li Chje Myon: “Qaysi nomzodni qoʻllab-quvvatlaganingizdan qatʼi nazar, men har bir fuqaroning xizmatkori boʻlaman”, — deya taʼkidladi.

U, shuningdek, sobiq prezidentning siyosiy mojarolari ortidan kelib chiqqan ijtimoiy boʻlinishni tiklash, demokratiyani kuchaytirish va iqtisodiy befarqlik, masʼuliyatsizlik natijasida yuzaga kelgan inqirozni bartaraf etish lozimligini aytdi.

Iqtisodiyot boʻyicha yangi rahbar “amaliy va bozor tamoyillariga asoslangan” yondashuvni tanlashini maʼlum qildi. Uning soʻzlariga koʻra, hukumat nazorat qiluvchi emas, balki qoʻllab-quvvatlovchi boʻlishi kerak. U sunʼiy intellekt va yarimoʻtkazgichlar kabi ilgʻor texnologiyalarni rivojlantirish orqali iqtisodiy oʻsishni ragʻbatlantirish niyatida ekanini bildirdi.

Tashqi siyosatda ham Li Chje Myon milliy manfaatlarga asoslangan “amaliy diplomatiya” yuritishni maqsad qilganini eʼlon qildi. U Janubiy Koreya, AQSH va Yaponiya oʻrtasidagi uch tomonlama hamkorlikni mustahkamlash, ayni vaqtda boshqa qoʻshni davlatlar bilan ham manfaat asosida muloqotni davom ettirishga ahd qilganini aytdi. Shuningdek, Shimoliy Koreya bilan ziddiyatli munosabatlarga qaramay, barqaror tinchlikka erishish uchun muloqot eshiklarini ochiq qoldirishga tayyor ekanini maʼlum qildi.

Inauguratsiya marosimida Janubiy Koreya parlamentining uch tarmogʻi rahbarlari, hukumat aʼzolari va qonunchilar ishtirok etdi. Biroq marosimga xorijiy mehmonlar taklif etilmadi. Tadbirdan oldin yangi prezident Seul milliy qabristoniga tashrif buyurib, halok boʻlgan harbiy xizmatchilar xotirasiga hurmat bajo keltirdi.

Prezidentlik idorasi bergan maʼlumotga koʻra, rasmiy tantanali inauguratsiya 17-iyulda, Konstitutsiya kuni bilan birgalikda oʻtkaziladi. Bu tadbir “Tayinlash marosimi” deb nomlanadi va prezidentning “xalq prezidentni tayinlaydi” degan qarashini ifodalaydi. Mazkur sanani tanlash esa, konstitutsiyaviy tartibni mustahkamlashga boʻlgan sadoqatini anglatadi.