Janubiy Koreya tarixida ilk bor Oʻzbekiston fuqarolariga Ulsan shahri meriyasi orqali soddalashtirilgan tartibda mehnat vizalarini berish mexanizmlari joriy etiladi. Bu haqda Tashqi ishlar vazirligi matbuot xizmati xabar berdi.

Unga koʻra, 17-mart kuni Oʻzbekiston Respublikasi Tashqi ishlar vaziri oʻrinbosari Olimjon Abdullayev va Ulsan shahri meri Kim Du Gyom boshchiligidagi Koreya Respublikasi delegatsiyasi oʻrtasida uchrashuv oʻtkazildi.

Unda Kadrlar salohiyatini rivojlantirish, Oʻzbekistondan mehnat resurslarini shahardagi yirik sanoat obyektlariga jalb etish boʻyicha hamkorlikni kengaytirish masalalari muhokama qilingan.

Ulsan shahri meri Kim Du Gyom Koreya tarixida ilk bor Oʻzbekiston fuqarolariga shahar meriyasi orqali soddalashtirilgan tartibda mehnat vizalarini berish mexanizmlari koʻzda tutilayotganini taʼkidlagan.

Xususan, Ulsan shahar hokimligi tomonidan Oʻzbekiston fuqarolari uchun bir qator imtiyozlar joriy etilmoqda. Bitiruvchilar uch oylik kasbiy tayyorgarlik va til oʻrganish kurslarini tamomlagandan soʻng mehnat vizasi olinadi va ishga joylashtiriladi.

“Bunday mexanizm pilot loyiha sifatida birinchi marta qoʻllanilmoqda. Agar natija ijobiy boʻlsa, boshqa shaharlar ham Oʻzbekiston fuqarolari uchun ushbu mexanizmni joriy etishi mumkin”, — deydi Kim Du Gyom.

Uchrashuv davomida Koreya tomoni Oʻzbekiston tomonining Ulsan korxonalarida Oʻzbekiston fuqarolarini oilalari bilan birgalikda, agar ular noqonuniy holga kelib qolmagan boʻlsa, tashkiliy ravishda ishga joylashtirish imkoniyati haqidagi soʻrovini koʻrib chiqishga tayyorligini bildirgan.