YUNESKOning Parijdagi qarorgohida Xalqaro turkiy madaniyat tashkiloti (TURKSOY) tashkil etilganining 30-yilligiga bagʻishlangan “Biz birgamiz” konsert dasturi boʻlib oʻtdi.

Tadbirda TURKSOY rahbariyati va unga aʼzo davlatlar, shuningdek, YUNESKO mutasaddilari va xodimlari, xorijiy davlatlar elchilari, Fransiya ishbilarmon va ilmiy doira vakillari, madaniyat arboblari, shuningdek, faol vatandoshlar qatnashdi.

Madaniy anjumanning faxriy mehmonlari sifatida Turkiy davlatlar tashkiloti (TDT) bosh kotibi Kubanichbek Omuraliyev, YUNESKO Bosh konferensiyasi raisi Simona-Mirela Mikulesku, YUNESKO bosh direktorining tashqi aloqalar boʻyicha oʻrinbosari Antonio Oxemeng-Boama, TURKSOY bosh kotibining oʻrinbosari Sayit Yusuf va boshqalar ishtirok etishdi.

Konsert dasturi avvalida YUNESKO kotibiyati va TURKSOY vakillari soʻzga chiqib, ishtirokchilarni qutlashdi. Ular, shuningdek, Oʻzbekistonning turkiy dunyoda, jumladan, TURKSOY faoliyatidagi oʻrni va ahamiyatini yuqori baholashdi.

Gala-konsertda Oʻzbekiston davlat filarmoniyasi jamoasi, “Navroʻz” ashula va raqs ansambli, “Bek” doirachilar guruhi va boshqalar oʻzlarining madaniy dasturlarini taqdim etishdi.

Mehmonlar Oʻzbekiston sanʼat ustalari tomonidan ijro etilgan milliy kuy va qoʻshiqlarni olqishlar bilan kutib olishdi hamda yuqori baholashdi.