11-mart kuni Toshkent shahrining Mirobod tumanida ayol voyaga yetmagan bolalari bilan birgalikda tilanchilik qilib yurgan vaqtida qoʻlga olindi. Holat yuzasidan poytaxt IIBB maʼlumot berdi.

Unga koʻra, 36 yoshli fuqaro X.A. (muqaddam maʼmuriy javobgarlik toʻgʻrisidagi kodeksning 47, 161, 183, 188 prim.3-moddalari bilan javobgarlikka tortilgan) oʻzining 2015, 2020 va 2022-yillarda tugʻilgan farzandlaridan foydalanib, tilanchilik bilan shugʻullanganligi aniqlangan.

Mazkur huquqbuzarlikni toʻxtatish va qonuniy chora koʻrish maqsadida PPX xodimlari ushbu ayolni yaqin oradagi IIBga olib bormoqchi boʻlishgan, biroq fuqaro ichki ishlar xodimlarining qonuniy talablarini bajarmagan. Ushbu holat tasvirlangan videolar esa ijtimoiy tarmoqlarda turlicha muhokamalarga sabab boʻlmoqda.

Ushbu holat yuzasidan Mirobod tumani IIO FMB tomonidan fuqaroga nisbatan Maʼmuriy javobgarlik toʻgʻrisidagi kodeksning 183-moddasi (Mayda bezorilik), 188−3-moddasi (Tilanchilik qilish) va 194-moddasi (Ichki ishlar organlari xodimining qonuniy talablarini bajarmaslik) bilan maʼmuriy bayonnoma rasmiylashtirilgan.

Uch nafar voyaga yetmagan bolalarning huquqlarini himoya qilish va ijtimoiy yordam koʻrsatish maqsadida Toshkent shahar IIBB Voyaga yetmaganlarga ijtimoiy-huquqiy yordam koʻrsatish markaziga joylashtirish choralari koʻrilmoqda. Videotasvirda aks etgan holatda xodimlarning harakatiga baho berish maqsadida xizmat tekshiruvi tayinlandi.