Faoliyat boshlaganiga yarim asr toʻlgan 8 – son musiqa va sanʼat maktabi uchun 2026-yilning dastlabki oyi oʻzgacha ruhda kechmoqda. Negaki, Vobkent tumanidagi mazkur dargohga zamonaviy qulayliklarga ega qoʻshimcha bino qurilib foydalanishga topshirildi.

-Madaniyat va sanʼat sohasida yosh isteʼdodlarni izlab topish, qoʻllab – quvvatlash, ular qobiliyatini yuzaga chiqarish borasida jamoamiz katta tajribaga ega,- deydi maktab direktori Alisher Nasullayev. - Yarim asr davomida bu yerdan koʻplab iqtidor egalari yetishib chiqdi. Ular boy madaniy merosimizni asrab – avaylash, sanʼat jozibasidan xalqimizni bahramand etishda kamarbasta boʻldi. Bizga shunday zamonaviy qoʻshimcha binoning qurilib foydalanishga topshirilishi esa yosh isteʼdodlarga davlatimiz tomonidan koʻrsatilayotgan gʻamxoʻrlik ifodasidir. Bu kabi yumushlarda Prezidentimizning 2022-yil 2-fevraldagi “Madaniyat va sanʼat sohasini yanada rivojlantirishga doir qoʻshimcha chora – tadbirlar toʻgʻrisida”gi qarori dasturilamal vazifasini oʻtamoqda.

100 oʻringa moʻljallangan bino “Tashabbusli byudjet” loyihasi doirasida ajratilgan 1,5 milliard soʻm miqdoridagi mablagʻ evaziga barpo etildi. Shuningdek, tuman hokimligi tashabbusi bilan maktab moddiy – texnikasini mustahkamlash uchun 70 million soʻm mablagʻ xarj qilindi. Ayni damda maktabda madaniyat va sanʼatga mehr qoʻygan 274 oʻquvchi tahsil olmoqda.

Istam IBROHIMOV, “Xalq soʻzi”.