Foto: Oliy taʼlim vazirligi

Prezidentning joriy yil 11-sentyabrdagi 274-son qarori bilan Toshkent shahrida “ToshTech” texnika universitetini tashkil etilishi toʻgʻrisida xabar berilgan edi. Hukumatning tegishli qaroriga koʻra, Xudoyqulov Adxam Yusupovich mazkur universitet rektori etib tayinlandi. Bu haqda Oliy taʼlim, fan va innovatsiyalar vazirligi matbuot xizmati maʼlum qildi.

Adxam Xudoyqulov bunga qadar Prezident Administratsiyasi huzuridagi Taʼlim sifatini taʼminlash milliy agentligi direktori lavozimida ishlab kelayotgan edi. Undan avval esa “Taʼlim sohasidagi loyihalar markazi” loyiha ofisi rahbari sifatida faoliyat yuritgan.

“ToshTech” texnika universiteti

Prezident qarorida keltirilishicha, “ToshTech” texnika universiteti akademik, moliyaviy va tashkiliy-boshqaruv sohalarida mustaqil hisoblanadi. Unda 2025/2026 oʻquv yilidan Davlat byudjetidan moliyalashtiriladigan 1-yillik tayyorlov kursi joriy etiladi.

2026/2027 oʻquv yilidan bakalavriat taʼlim yoʻnalishlari boʻyicha taʼlim jarayoni yoʻlga qoʻyiladi. 2027/2028 oʻquv yilidan bosqichma-bosqich magistratura va oliy taʼlimdan keyingi taʼlim bosqichlari joriy etiladi.

Universitetda taʼlim jarayoni davlat granti va toʻlov-kontrakt asosida davlat va xorijiy tillarda amalga oshiriladi. 2029/2030 oʻquv yiligacha oʻqishga qabul qilingan talabalar toʻliq davlat granti asosida oʻqitiladi.