Foto: Prezident matbuot xizmati

Oʻzbekiston Prezidenti Shavkat Mirziyoyev ayni damda AQSH Tinchlik institutida boʻlib oʻtayotgan “Tinchlik kengashi”ning birinchi yigʻilishida nutq soʻzlamoqda. Ushbu tadbir Oq uy tomonidan toʻgʻridan toʻgʻri yoritilmoqda.

Davlatimiz rahbarining qayd etishicha, Oʻzbekiston “Tinchlik kengashi”ni tuzish boʻyicha tinchlikparvar tashabbusni qoʻllab-quvvatlaydi va uni muvaffaqiyatli amalga oshirishda amaliy ishtirok etish niyatini qatʼiy bildiradi.

“Amerika Qoʻshma Shtatlari Prezidenti Donald Trampga kengashning ilk yigʻilishini chaqirgani uchun samimiy minnatdorlik izhor etishga ijozat bergaysiz. Shubhasiz, bugungi sammit – Prezident Trampning siyosiy irodasi va pragmatizmi natijasidir”, dedi Oʻzbekiston rahbari.

Shavkat Mirziyoyevning taʼkidlashicha, Kengash faoliyati Gʻazo sektorida iqtisodiy va ijtimoiy tiklanish uchun qulay sharoit yaratishga xizmat qiladi.

Oʻzbekiston Prezidenti, shuningdek, har qanday tashqi boshqaruv mexanizmi mahalliy aholi qoʻllab-quvvatlovida amalga oshirilishini hamda muvofiqlashtirilgan saʼy-harakatlar urushdan keyingi jarayon barqarorligini taʼminlab, Gʻazoni tezroq tiklash uchun sharoit yaratishini bildirdi.

Bundan tashqari, Oʻzbekiston turar joylar, bolalar bogʻchalari, maktablar va shifoxonalar qurilishiga oʻz hissasini qoʻshishga tayyor ekani maʼlum qilindi.