Foto: Milliy kinematografiyani rivojlantirish markazi

“Yakshanba” filmi rejissyori Shokir Xoliqov Qozogʻistondagi Bastau xalqaro kinofestivalida (Bastau International Film Festival) “Eng yaxshi rejissyor” nominatsiyasida gʻolib boʻldi. Bu haqda Milliy kinematografiyani rivojlantirish markazi Axborot xizmati xabar berdi.

Maʼlumot uchun, Kinematografiya agentligi buyurtmasiga binoan yaratilgan “Yakshanba” filmi XV Toshkent xalqaro kinofestivalining Markaziy Osiyo filmlari tanlovida “Eng yaxshi film” deb topilgan. Shuningdek, film Shanxay xalqaro kinofestivalida “Osiyoning yangi iqtidorlari” nominatsiyasida ham gʻolib boʻlgan boʻlsa, Qirgʻizistondagi xalqaro kinofestivalda gran-pri sovrinini qoʻlga kiritgan. Bundan tashqari Osiyodagi eng yaxshi filmlarni aniqlash va ularni mukofotlash loyihasida taqdirlangan. Shu bilan birga Saudiya Arabistonida boʻlib oʻtgan “Red Sea film festival“da Shokir Xoliqov ”Eng yaxshi rejissyor” deb tan olingan.

Avvalroq rejissyor Hindistonda oʻtkazilgan yuqori darajali festivalda “Eng yaxshi rejissyor”, “Yakshanba” filmi esa “Osiyoning eng yaxshi filmi” nominatsiyasida gʻolib boʻlgan edi.