AQSH prezidenti Donald Tramp maʼmuriyati Ukrainaga Rossiya hududining chuqur qismida joylashgan energetika infratuzilmasi obyektlariga zarba berish uchun zarur boʻlgan razvedka maʼlumotlarini taqdim etishga rozilik berdi. Bu haqda The Wall Street Journal xabar qildi.

Nashrning yozishicha, ushbu qaror Tramp maʼmuriyatining Ukrainaga uzoq masofaga uchuvchi qurol-yarogʻ, xususan, qanotli raketalarni taqdim etish imkoniyatlari ustida oʻylab koʻrayotgan bir paytda qabul qilindi.

Reuters agentligiga koʻra, Vashington allaqachon Kiyev bilan razvedka maʼlumotlari almashib kelgan. Biroq WSJning taʼkidlashicha, yangi qaror Ukrainaga Rossiya hududidagi neft qayta ishlash zavodlari, neft quvurlari, elektrostansiyalar va boshqa strategik infratuzilmalarga zarba berishni osonlashtiradi. Buning maqsadi — “Kremlni neft va daromaddan mahrum qilish” deb koʻrsatilgan.

Avvalroq The Telegraph xabar berishicha, Ukraina prezidenti Vladimir Zelenskiy BMT Bosh Assambleyasi doirasida Nyu-Yorkda boʻlib oʻtgan yopiq uchrashuvda Donald Trampdan Kiyevga uzoq masofaga uchuvchi “Tomagavk” qanotli raketalarini taqdim etishni soʻragandi.