Украина президенти Владимир Зеленский АҚШ раҳбари Дональд Трампдан узоқ масофали «Томагавк» қанотли ракеталарини беришни сўради. Унинг фикрича, Украинада бундай қурол-яроғнинг жойлаштирилиши Владимир Путинни музокаралар столига ўтиришга мажбур қилиши мумкин. Бу ҳақда The Telegraph хабар берди.

Маълумотларга кўра, Зеленский Нью-Йоркда БМТ Бош Ассамблеяси доирасида ўтган ёпиқ учрашувда Трампдан масофаси 2400 кмдан ошадиган «Томагавк» ракеталарини Украинани қўллаб-қувватлаш учун беришни сўраган.

Манбаларнинг айтишича, Зеленский ракеталар Москвагача етиб бора олишини таъкидлаб, бу Кремлни тинчлик музокараларига мажбурлаши мумкинлигини билдирган.

Президентлар ўртасидаги суҳбатни манбалар ижобий деб баҳолаган, аммо Трамп розилик берган-бермагани ҳали номаълум.

АҚШ давлат котиби Марко Рубио, манбаларга кўра, Европа ҳамкорларига Вашингтоннинг Украинага нисбатан риторикасидаги ўзгаришни «жуда ижобий» деб баҳолаш лозимлигини айтган. Шу билан бирга, манбаларнинг сўзларига кўра, Трамп Путиннинг урушни тугатишга қаратилган саъй-ҳаракатларини етарлича қадрламаётганидан «жуда ғазабда».

Axios нашрига берган интервюсида Зеленский АҚШдан янги узоқ масофали қурол сўраганини тасдиқлади, аммо турини очиқламади.

The Wall Street Journal маълумотларига кўра, Трамп Украинага АҚШ қуроли билан Россия ҳудудини уришга рухсат бериш имкониятини инкор қилмаган. Шу билан бирга, у бу масалада ҳеч қандай қатъий мажбурият олмаганини айтган.