Foto: Getty images

UYEFA 2023-2024-yilgi Yevropa chempionlar ligasining eng yaxshilarini maʼlum qildi. “Mavsumning eng yaxshi futbolchisi” nomiga Madridning “Real” klubi vingeri Vinisius Junior loyiq deb topildi.

Mavsum Chempionlar ligasida braziliyalik futbolchi 10 ta oʻyin oʻtkazib, 6 ta gol urdi va 5 ta golli uzatmani amalga oshirdi.

Madridning yana bir isteʼdodli yarim himoyachisi Jud Bellingem joriy mavsumda Chempionlar ligasining eng yaxshi yosh futbolchisi deb topildi. Bellingem 2023-yil yozidan beri “Real”da oʻynamoqda. Bungacha angliyalik yarim himoyachi Dortmundning “Borussiya” klubi sharafini himoya qilgan edi.

Vinisius va Bellingem “Real” bilan birgalikda finalda Dortmundning “Borussiya” jamoasini 2:0 hisobida magʻlub etib, turnir gʻolibiga aylandi.

“Real Madrid”ning yana bir yarim himoyachisi Federiko Valverdening “Manchester Siti” darvozasiga toʻp kiritgan goli “Mavsumning eng chiroyli goli” sifatida qayd etildi.

Bundan tashqari, UYEFA matbuot xizmati Chempionlar ligasining ramziy terma jamoasini ham tuzdi. Ushbu jamoadan 4 nafardan “Borussiya” va “Real” klubi futbolchilari, 1 nafardan “PSJ”, “Manchester Siti” va “Bavariya” futbolchilari oʻrin olgan.