Urganch xalqaro aeroporti vaqtincha yopildi. Bu haqda Transport vazirligi axborot xizmati xabar berdi.

Bildirilishicha, Urganch xalqaro aeroporti uchish-qoʻnish yoʻlagini kapital taʼmirlash ishlari boshlanishi munosabati bilan joriy yilning 20-iyul kuni soat 00:01 dan shu yilning 7-avgusti soat 23:59 gacha faoliyatini toʻxtatadi.

Qayd etilishicha, uchish-qoʻnish yoʻlagining uzoq muddatdan beri ishlashi hamda havo kemalarining qoʻnishi va uchishi xavfsizligini taʼminlash maqsadida kapital qurilish va taʼmirlash ishlari olib boriladi. Xususan, uzunligi 3000 m. va eni 16 m. boʻlgan uchish-qoʻnish yoʻlagi yuzasini butunlay almashtirish va mustahkamlash rejalashtirilgan. Shuningdek, ikkinchi va uchinchi yurish yoʻlaklari kapital taʼmirlanadi.

«Rekonstruksiya davrida barcha rejalashtirilgan reyslar Nukus xalqaro aeroportiga yoʻnaltiriladi, yoʻlovchilar Nukus va Urganch aeroportlari oʻrtasida transferlar bilan taʼminlanadi. Parvozlar haqida qoʻshimcha maʼlumot olish uchun aviakompaniyalarga murojaat qilish tavsiya etiladi», deyiladi xabarda.

Taʼkidlanishicha, mazkur aeroportning uchish-qoʻnish yoʻlagi kapital taʼmirdan soʻng Boeing 787 va Airbus A330 kabi keng fyuzelyajli samolyotlarni cheklovlarsiz qabul qila oladi.

Maʼlumot uchun, Urganch shahridagi uchish-qoʻnish yoʻlagini kapital rekonstruksiya qilish oxirgi marta 1997-yilda, shikastlangan qismlarini qisman taʼmirlash esa 2018-yilda amalga oshirilgan.