Kiyev oʻzining mamlakatda ishlab chiqarilgan ilk ballistik raketasini muvaffaqiyatli sinovdan oʻtkazdi, deb maʼlum qildi prezident Vladimir Zelenskiy Kiyevdagi matbuot anjumanida.

Maʼlum boʻlishicha, Ukraina Rossiya bilan davom etayotgan mojarolar sharoitida mudofaa texnologiyalari boʻyicha oʻsib borayotgan imkoniyatlarini koʻrsatib qoʻyish maqsadida bu sinovlarni oʻtkazgan. Raketa sinovi Ukrainaning harbiy strategiyasi uchun uzoq muddatli harakat rejasining bir qismi boʻlishi mumkin.

Ukraina Mudofaa vaziri Rustem Umerov Rossiyaning dron hujumlariga qarshi turish uchun mamlakat oʻz qurollarini ishlab chiqarishi zarurligini bildirgan. Kiyev Gʻarb ittifoqchilaridan uzoq masofaga uchuvchi raketalarni olgan boʻlsada, Rossiya hududida ulardan foydalanishga cheklovlar ularning samaradorligini cheklaydi. Ukrainaning oʻz harbiy texnologiyasini rivojlantirishga eʼtibor qaratishi ushbu cheklovlarni yengib oʻtishga qaratilgan.

Xavfsizlik boʻyicha ekspert Viktoriya Vdovichenko Ukraina harbiy texnologiyalar innovatsiyalari markaziga aylanib borayotganini taʼkidlab, uni “harbiy Silikon vodiysi”ga qiyosladi.

Qayd etish kerakki, Ukraina kompaniyalari dron tizimlari kabi ilgʻor mudofaa texnologiyalarini faol ishlab chiqarmoqda. Zelenskiy Ukraina mudofaa sanoatining saʼy-harakatlarini yuqori baholagan, ammo yangi raketa haqida batafsil maʼlumot bermagan.

Shuningdek, Ukraina rahbari mamlakat joriy yilda 2 million donagacha dron ishlab chiqarishi mumkinligini aytib oʻtgan. Shunga qaramasdan, buni kim yoki qaysi davlat moliyalashtirishi nomaʼlumligicha qolgan.

Ukrainalik general Aleksandr Sirskiyning xabar berishicha, ukrainalik qoʻshinlar Rossiya nazoratidagi 500 kvadrat milyalik yerni egallab olgan. Ushbu harbiy muvaffaqiyatlar Rossiya kuchlarini Pokrovsk va Kuraxov kabi muhim hududlardan chalgʻitish boʻyicha kengroq strategiyaning bir qismidir.

RFning Rostov viloyatiga 28-avgustga oʻtar kechasi dronlar hujumi uyushtirilgan. Viloyat gubernatori Vasiliy Golubev mintaqa osmonida toʻrtta dron urib tushirilganini yozdi. Dastlabki maʼlumotlarga koʻra, qurbonlar yoʻq. Shuningdek, Ukraina ilk bor Kirov viloyatiga dronlar uchirgan. Hujumlar “Zenit” zavodiga berilgan va buni Rossiya tomoni tasdiqladi.

Hozirgi kunda Ukraina Kursk viloyatining 13 ming kvadrat kilometr maydonini egallab, 100 ga yaqin aholi punktini nazorat qilmoqda. 600 nafarga yaqin rus askari asirga olingani maʼlum. Rossiya hududga 30 mingga yaqin askar joylashtirgan va bu raqamlar oʻsib bormoqda.

Janubiy Koreya armiyasining matbuot xabariga koʻra, Shimoliy Koreya qurol va oʻq-dorilar ortilgan 13 mingdan ortiq konteynerni Moskvaga joʻnatgan.

Isroil nigohi Gʻarbiy sohilda

Isroil yuzlab askarlari va havo kuchlarini 2002-yildan beri eng katta hujumga jalb qilmoqda. Falastin sogʻliqni saqlash rasmiylari va ommaviy axborot vositalariga koʻra, Isroil ishgʻol qilingan Gʻarbiy sohilning Shimoliy qismida keng koʻlamli quruqlik va havo hujumini boshlaganidan keyin kamida toʻqqiz kishi halok boʻldi.

Falastin qizil yarim oy jamiyati tez yordam departamenti direktori Tubasdagi Farʼa qochqinlar lagerida Isroil hujumi sabab toʻrt kishi qurbon boʻlganini aytdi.

Rasmiy Isroil radiosining taʼkidlashicha, Gʻarbiy sohildagi 2002-yildan keyingi eng yirik hujum kelayotgan haftada amalga oshirilishi mumkin. Yaqin Sharq siyosiy tahlilchisi Omar Baddarning aytishicha, bu Falastin hududini etnik jihatdan tozalash boʻyicha uzoq muddatli Isroil strategiyasining bir qismidir. Isroil Gʻarbiy sohilning ulkan qismlarini uzoq vaqt davomida qoʻshib olish va etnik tozalashni niyat qilgan.

Isroil gumanitar markazlarni evakuatsiya qilmoqchi

BMT urush boshlanganidan beri Gʻazoda ikkinchi marta gumanitar yordam markazini evakuatsiya qilishga majbur boʻldi. Bu Isroil harbiylarining buyrugʻi bilan amalga oshirilgan.

Omborlar va xodimlar uchun turar joy bilan jihozlangan markaz may oyining boshida Gʻazoning janubidagi Rafahga Isroil bosqini tufayli koʻchirilgan edi. Anklavning Markaziy qismida joylashgan Deyr Al – Balahda turar joy, ofis va gumanitar tovarlarni saqlash xonalariga ega boʻlgan yangi markaz tashkil etildi, ammo yangi evakuatsiya qilish toʻgʻrisidagi buyruq markazning koʻchirilishiga olib keldi.

BMT xavfsizlik boshligʻiga koʻra, dam olish kunlari Isroil harbiylari 200 dan ortiq BMT xodimlarining Deyr Al-Balahdagi ofislari va yashash joylaridan chiqib ketishlari uchun bir necha soat oldin xabar bergan. Shuningdek, uning qoʻshimcha qilishicha, bu kabi ommaviy evakuatsiya buyurtmalari BMT va gumanitar xodimlar uchun chidab boʻlmas tahdidlarning biridir. Xalqaro qutqaruv qoʻmitasi seshanba kuni Isroil buyruqlari ogʻir ahvolda qolgan aholiga gumanitar yordamlarning yetib bormasligiga sabab boʻlgan.