Ukraina Kaspiy dengizidagi Rossiya kemalariga uchuvchisiz dronlar yordamida zarba berdi. Bu hujum Ukraina hududidan yuzlab kilometr uzoqlikda, Rossiyaning Kaspiysk portida amalga oshirilgan. Ukraina Milliy xavfsizlik va mudofaa kengashi vakili Andrey Kovalenko ushbu hujum haqida “Telegram” orqali xabar berdi.

Rossiyaning Dogʻiston viloyati gubernatori Sergey Melikov Kaspiysk ustida Rossiya havo mudofaasi uchuvchisiz dron qurilmani yoʻq qilganini bildirdi. Melikovning aytishicha, mahalliy hukumat hujumni tadqiq qilmoqda. Shu bilan birga, Rossiya Mudofaa vazirligi Dogʻistonda Ukraina dronlari kuzatilgani haqida maʼlumot bermagan.

Ukraina OAV xabariga koʻra, “Dagestan” va “Tatarstan” raketa kemalari zararlangan. Boshqa kemalar ham zararga uchragan boʻlishi mumkin, lekin bu hali tasdiqlanmagan. Kaspiysk porti Ukrainadan qariyb 1,6 ming kilometr uzoqlikda joylashgan va u Kaspiy flotining kemalari uchun muhim hudud hisoblanadi.

Qayd etilishicha, ijtimoiy tarmoqlarda va ochiq manbalarda Kaspiysk portiga qilingan hujum aks etgan videolar tarqaldi. Videolarda port yaqinida uchayotgan dronlar va portlashlar koʻrinadi. “Nevsveyek” manbasi ushbu tasvirlarni mustaqil ravishda tasdiqlash imkoniyati mavjud emasligini bildirgan.

Ukraina Rossiyaning yuqori qiymatli harbiy obyektlarini oʻz hududida va Moskva nazorati ostidagi hududlarda nishonga olishda davom etmoqda. Odatda, hujumlar uzoq masofali portlovchi dronlar yordamida amalga oshiriladi. Ukraina ayniqsa Rossiyaning Qora dengiz floti bazalariga zarbalar berishga eʼtibor qaratmoqda.

Ukraina asosiy harbiy dengiz kuchlariga ega boʻlmasa-da, uning hujumlari Rossiyaning Qora dengizdagi harakatlarini cheklashga majbur qilmoqda. Kiyev, shuningdek, Rossiyaning Novorossiyskdagi Qora dengiz floti bazasini ham nishonga olgan. Ukraina harbiy razvedkasi oʻtgan oyda Rossiyaning Baltika flotiga qarashli kemani Kaliningraddagi Baltiysk portida zararsizlantirganini maʼlum qilgandi.

Avvalroq, Oʻzbekiston Rossiya yoki Xitoyning qaysi biri bilan kattaroq savdo aylanmasiga egaligi haqida xabar berilgandi.