Украина Каспий денгизидаги Россия кемаларига учувчисиз дронлар ёрдамида зарба берди. Бу ҳужум Украина ҳудудидан юзлаб километр узоқликда, Россиянинг Каспийск портида амалга оширилган. Украина Миллий хавфсизлик ва мудофаа кенгаши вакили Андрей Коваленко ушбу ҳужум ҳақида «Телеграм» орқали хабар берди.

Россиянинг Доғистон вилояти губернатори Сергей Меликов Каспийск устида Россия ҳаво мудофааси учувчисиз дрон қурилмани йўқ қилганини билдирди. Меликовнинг айтишича, маҳаллий ҳукумат ҳужумни тадқиқ қилмоқда. Шу билан бирга, Россия Мудофаа вазирлиги Доғистонда Украина дронлари кузатилгани ҳақида маълумот бермаган.

Украина ОАВ хабарига кўра, «Дагестан» ва «Татарстан» ракета кемалари зарарланган. Бошқа кемалар ҳам зарарга учраган бўлиши мумкин, лекин бу ҳали тасдиқланмаган. Каспийск порти Украинадан қарийб 1,6 минг километр узоқликда жойлашган ва у Каспий флотининг кемалари учун муҳим ҳудуд ҳисобланади.

Қайд этилишича, ижтимоий тармоқларда ва очиқ манбаларда Каспийск портига қилинган ҳужум акс этган видеолар тарқалди. Видеоларда порт яқинида учаётган дронлар ва портлашлар кўринади. «Newsweek» манбаси ушбу тасвирларни мустақил равишда тасдиқлаш имконияти мавжуд эмаслигини билдирган.

Украина Россиянинг юқори қийматли ҳарбий объектларини ўз ҳудудида ва Москва назорати остидаги ҳудудларда нишонга олишда давом этмоқда. Одатда, ҳужумлар узоқ масофали портловчи дронлар ёрдамида амалга оширилади. Украина айниқса Россиянинг Қора денгиз флоти базаларига зарбалар беришга эътибор қаратмоқда.

Украина асосий ҳарбий денгиз кучларига эга бўлмаса-да, унинг ҳужумлари Россиянинг Қора денгиздаги ҳаракатларини чеклашга мажбур қилмоқда. Киев, шунингдек, Россиянинг Новороссийскдаги Қора денгиз флоти базасини ҳам нишонга олган. Украина ҳарбий разведкаси ўтган ойда Россиянинг Балтика флотига қарашли кемани Калининграддаги Балтийск портида зарарсизлантирганини маълум қилганди.

Аввалроқ, Ўзбекистон Россия ёки Хитойнинг қайси бири билан каттароқ савдо айланмасига эгалиги ҳақида хабар берилганди.