Foto: AP

AQSHning saylangan prezidenti Donald Tramp 7-noyabr, payshanba kuni Rossiya yetakchisi Vladimir Putinga qoʻngʻiroq qilib, Ukrainadagi vaziyatni keskinlashtirmaslikka chaqirdi.

“The Washington Post” nashrining yozishicha, siyosatchi Kiyevni qoʻllab-quvvatlash uchun sarflagan mablagʻlari amerikalik soliq toʻlovchilar uchun qanday oqibatlarga olib kelishidan xavotir bildirgan. Tramp dunyo Ukraina hukumatidan hududning bir qismini, masalan, Qrimni berishni talab qilishi mumkinligini aytgan.

AQSHning saylangan prezidenti, shuningdek, Rossiya rahbari bilan “Ukrainadagi urushni tezroq hal etishni muhokama qilish” uchun keyingi suhbatlarga qiziqish bildirgan.

Bundan tashqari, Tramp AQSHning Yevropadagi harbiy mavjudligini eslatgan. Siyosatchilar Yevropa qitʼasida tinchlikka erishish imkoniyatlarini ham muhokama qilishdi.

Ukraina hukumati AQSHning saylangan prezidentining Rossiya rahbariga qoʻngʻiroq qilgani haqida maʼlum qilindi. Vaziyatdan xabardor manbalarga koʻra, Ukraina rasmiylari suhbatga eʼtiroz bildirmagan.

Nashr maʼlumotlariga koʻra, Ukraina rasmiylari “Tramp Ukraina masalasini diplomatik yoʻl bilan hal qilish boʻyicha Putin bilan muloqot qilishini ancha oldin tushunishgan”.

Avvalroq “The Wall Street Journal” nashri AQSH prezidentlik saylovlarida gʻalaba qozongan Tramp Ukrainani Rossiya bilan muzokara stoliga oʻtkazishi mumkinligini yozgan edi. Qayd etilishicha, yangi saylangan Amerika rahbari Kiyev oʻz mavqeini yoʻqotishi fonida oʻzining ambitsiyali dasturini amalga oshirish imkoniyatiga ega.

Bundan tashqari, Tramp jamoasi Ukraina mojarosiga barham berish boʻyicha yangi rejani muhokama qilayotgani maʼlum boʻldi. “The Wall Street Journal” maʼlumotlariga koʻra, oʻtish davri maʼmuriyati hozirgi front chizigʻini muzlatib qoʻyish, u boʻylab qurolsizlantirilgan hudud yaratish, shu bilan birga, agar Ukraina 20-yil ichida NATOga qoʻshilishdan bosh tortsa, Kiyevni qurol-yarogʻ bilan taʼminlash niyatida.

AQSH prezidentining milliy xavfsizlik masalalari boʻyicha yordamchisi Jeyk Sallivanning aytishicha, Amerika yetakchisi Jo Bayden shaxsan Trampdan Ukrainaga yordamni toʻxtatmaslikni soʻraydi.

Jeyk Sallivanning aytishicha, Prezident Bayden kelasi 70 kun ichida Kongress va kelayotgan maʼmuriyatga Qoʻshma Shtatlar Ukrainadan chiqmasligi kerakligini isbotlash imkoniyatiga ega boʻladi.

Sallivan, shuningdek, AQSHning hozirgi maʼmuriyati Kongress avvalroq Ukrainaga yordam berish uchun ajratgan barcha mablagʻlarni amalga oshirishni rejalashtirayotganini aytdi. Uning taʼkidlashicha, gap Kiyev kelasi yilning 20-yanvarigacha oladigan olti milliard dollar haqida ketmoqda.

Trampning oʻgʻli AQSHning Ukrainaga koʻrsatayotgan yordami yaqin orada tugashi haqidagi videoni joylashtirdi.

Kichik Donald Tramp ijtimoiy tarmoqlarda AQSHning Ukrainaga harbiy yordami yaqin orada toʻxtatilishi haqidagi videoni joylashtirdi. Kadrlarda Trampning Ukraina prezidenti Vladimir Zelenskiy bilan uchrashuvi tasvirlangan boʻlib, unda “Moliyaviy yordamingizni yoʻqotishingizga 38 kun qoldi” degan yozuv bor.

Videoning oxirida Ukraina rahbarining yaqindan olingan surati berilgan, keyin esa fotosurat oq-qora rangga aylanadi.