AQSH Yaqin Sharqdagi harbiy harakatlarini kuchaytirishga kirishdi. “Fox News” telekanali xabariga koʻra, Amerika qoʻshinlari mintaqaga qoʻshimcha qiruvchi samolyotlarni joʻnatmoqda hamda u yerdagi aviatsiya kuchlari dislokatsiyasini uzaytirmoqda.

CNN manbalari maʼlum qilishicha, AQSH prezidenti Donald Tramp Eronga qarshi ehtimoliy havo hujumi ssenariylarini koʻrib chiqmoqda. Shu doirada AQSH harbiylariga Isroilga yonilgʻi quyishda yordam berish haqida buyruq berish ehtimoli mavjud. Manbalarning taʼkidlashicha, harbiylar bunday amaliyotga tayyorgarlikni boshlab yuborgan.

“Axios” nashrining yozishicha, Tramp Eronning bir necha strategik obyektlari, jumladan, Fordo yadroviy kompleksi — uranni boyitish markaziga zarba berish imkonini muhokama qilmoqda.

Buyuk Britaniya ham Yaqin Sharqdagi harbiy harakatlarini faollashtirmoqda. Mamlakat mudofaa vaziri Jon Xilining maʼlum qilishicha, London mintaqadagi bazalariga qoʻshimcha qiruvchi samolyotlar joʻnatishga kirishgan.

“Independent” nashri xabar berishicha, samolyotlarning birinchi guruhi allaqachon oʻz manziliga yetib borgan.