AQSH prezidenti Donald Tramp Vashington Afgʻonistondagi Bagram aviabazasi ustidan nazoratni qaytarib olish uchun harakat qilayotganini maʼlum qildi. Bu haqda u Buyuk Britaniya bosh vaziri Kir Starmer bilan qoʻshma matbuot anjumanida gapirdi.

— Biz Bagramni oʻzimizga qoldirmoqchimiz. Bu dunyodagi eng yirik aviabaza. Uni hech qanday shartlarsiz topshirib qoʻydik. Aytgancha, biz uni qaytarib olishga urinmoqdamiz. Yaxshi eshitilyaptimi? Bu kichikkina sensatsiyaga aylanishi mumkin, — dedi Tramp.

Uning soʻzlariga koʻra, AQSH bazani qaytarib olishga bir necha sababga ega.

— Biz uni qaytarib olishni xohlaymiz, chunki ular bizdan ayrim narsalarni kutyapti. Biroq asosiy sabab shundaki, bu baza Xitoy oʻzining yadro qurolini ishlab chiqaradigan hududdan atigi bir soatlik masofada joylashgan, — dedi Tramp.

Maʼlumot uchun, 2001–2021-yillarda Bagram aerodromi AQSH boshchiligidagi xalqaro koalitsiyaning Afgʻonistondagi eng yirik bazasi boʻlib xizmat qilgan. 2021-yil iyul boshida amerikaliklar bazani tark etgan, 15-avgust kuni esa u Tolibon nazoratiga oʻtgan.