Foto: Sirojiddin Vohidov / “Xalq so‘zi”

Poytaxtimizda “Ishlab chiqarish texnologiyalari. Yogʻochsozlik. Mebel va butlovchi qismlar – “MebelExpo Uzbekistan 2024” XX yubiley xalqaro koʻrgazmasi boʻlib oʻtmoqda.

Uch kun davom etadigan ushbu koʻrgazmada 14 ta mamlakatdan 144 ta kompaniya vakillari ishtirok etmoqda. Eʼtiborlisi, xalqaro koʻrgazmada Avstriya, Belarus Respublikasi, Germaniya, Eron, Italiya, Qozogʻiston, Xitoy, Turkiya va Qirgʻiziston kabi mamlakatlar tadbirkorlari oʻz mahsulotlarini namoyish etishmoqda.

Koʻrgazmaning poytaxtimizda oʻtkazilayotganining oʻziga xos sabablari bor. Chunki mamlakatimizda keyingi yillarda mebel va yogʻochsozlik sanoati jadal rivojlanib, mahsulotni mahalliy bozorga va xorijga eksport qilish darajasi yuksalib bormoqda. Bir tomondan yurtimizda uy-joy majmualari, ijtimoiy infratuzilma obyektlari, maʼmuriy binolar va biznes markazlarining tez surʼatlarda qurilayotgani bu kabi mahsulotlarga boʻlgan talabni oshirmoqda. Qolaversa, respublikamizda mebel, materiallar, butlovchi buyumlar ishlab chiqaruvchi hamda yogʻochga ishlov beradigan korxonalar soni oshib bormoqda. Oxirgi 10-yilda ishlab chiqarilayotgan mahsulotlar turi sezilarli darajada kengayib, sifati va dizayni jahon tendensiyalariga mos ravishda yaxshilanib, tayyor mebel eksporti ham, importi ham ortib bormoqda.

— Koʻrgazmada 20 dan ortiq kompaniyalarimiz qatnashmoqda, — deydi turkiyalik tadbirkor Salim Shahin. — Oʻzbek tadbirkorlari tomonidan ishlab chiqarilgan mahsulotlarni oldindan bilardim, hozir esa ularni yaqindan kuzatdim, menga juda yoqdi. Bizda investitsiya kiritish istagi tugʻildi. Oʻzbek va turk tadbirkorlari ishtirokida qoʻshma korxonalar faoliyatini yoʻlga qoʻymoqchimiz.

Sohani izchil rivojlantirishda Prezidentimizning 2023-yil 10-fevraldagi “Mebel mahsulotlari ishlab chiqarish va eksport qilishni ragʻbatlantirishga oid qoʻshimcha chora-tadbirlar toʻgʻrisida”gi qarori asosida imtiyoz va yengilliklar joriy etilgani tadbirkorlar uchun dasturilamal boʻlib xizmat qilmoqda. Bu xalqaro koʻrgazmada ishtirok etayotgan mahalliy ishlab chiqaruvchilar mahsulotlarining bejirim va xilma-xilligi misolida ham yaqqol namoyon boʻlmoqda.

“MebelExpo Uzbekistan 2024” xalqaro koʻrgazmasi 30-mayga qadar davom etadi.

Foto: Sirojiddin Vohidov / “Xalq so‘zi”