Videodan kadr

Toshkent shahrida yuqori tezlikda harakatlangan “Malibu-2” haydovchisi YPX xodimini sudrab ketdi. Holat yuzasidan jinoiy ish qoʻzgʻatildi, deb xabar bermoqda YHXB.

Qayd etilishicha, hodisa Mirobod tumani Nukus—A.Qahhor koʻchalari kesishgan chorrahada yuz bergan. Haydovchi “Malibu-2” rusumli avtomobil davlat raqam belgilarini oʻzboshimchalik bilan yechib, maxsus antenna va “sirena” moslamasini oʻrnatib, yuqori tezlikda harakatlangan. U bu orqali oʻzi va oʻzgalarning hayotini xavf ostiga qoʻygan.

Bundan tashqari, bir necha marotaba YPX xodimlarining toʻxtash ishoralariga boʻysunmasdan harakatni davom ettirgan va ulardan birini avtomobilda turtib yuborgan. Shundan soʻng Nukus koʻchasi boʻylab “kapot” ustida sudrab ketgan. Oqibatda tan jarohati olgan YPX xodimiga shifokorlar tomonidan birinchi tez tibbiy yordam koʻrsatilgan.

Holat yuzasidan Mirobod tumani prokuraturasi tomonidan Jinoyat kodeksining 219-moddasi (hokimiyat vakiliga yoki fuqaroviy burchini bajarayotgan shaxsga qarshilik koʻrsatish) bilan jinoiy ish qoʻzgʻatilgan. Hozirda dastlabki tergov harakatlari olib borilmoqda.