Videodan kadr

Toshkent shahar IIBBning rahbar xodimlaridan biriga jinoyat ishi qoʻzgʻatmaslik evaziga 50 ming dollar taklif qilgan jinoiy javobgarlikka tortildi, deb xabar bermoqda IIBB matbuot xizmati.

Maʼlum qilinishicha, Toshkent shahar Ichki ishlar bosh boshqarmasi, Axborot texnologiyalari sohasidagi jinoyatlarga qarshi kurashish boshqarmasi tomonidan tezkor tadbir oʻtkazilgan. Unda ijtimoiy tarmoqlarda qimor va tavakkalchilikka asoslangan boshqa oʻyinlarni tashkil etish yoki oʻtkazish, shuningdek, xizmatlar koʻrsatishga koʻmaklashish faoliyatini amalga oshirib kelgan bir nechta shaxslardan tashkil topgan jinoiy guruh faoliyatiga chek qoʻyilgan.

Aniqlanishicha, qoʻlga olingan jinoiy guruh aʼzolari xorijiy onlayn qimor kompaniyalariga xizmat koʻrsatib, qimor oʻyinlari orqali olingan mablagʻlarni turli kriptovalyuta platformalari orqali oʻtkazgan va legallashtirgan. Ulardan toʻrt dona mobil telefon va pul yuvish uchun foydalanilgan 21 dona bank kartalari, shuningdek, bir dona noutbuk ashyoviy dalil sifatida olingan.

Shundan soʻng, hujjatlar rasmiylashtirilib, tergov boʻlimiga topshirilgan. Mazkur holat boʻyicha olib borilayotgan tergovga qadar tekshiruv harakatlari davomida gumonlanuvchi shaxslardan biri ishni “yopdi-yopdi” qilish evaziga poytaxt IIBB Axborot texnologiyalari sohasidagi jinoyatlarga qarshi kurashish boshqarmasi masʼul rahbarlaridan biriga 50 ming dollari miqdorida pora taklif qilgan.

Biroq ichki ishlar xodimi holat boʻyicha rahbariyatga bildirgi orqali murojaat qilgan. Uning bildirgisi asosida IIV Shaxsiy xavfsizlik bosh boshqarmasi Toshkent shahar boʻyicha boshqarmasi va prokuratura xodimlari hamkorligida tezkor tadbir oʻtkazilgan.

Tadbir davomida gumonlanuvchi IIO masʼul rahbarining xizmat xonasiga kirib, pora tariqasida 50 ming dollarni bergan vaqtida daliliy ashyolar bilan ushlangan va bu jarayon xolislar ishtirokida bayonnoma asosida rasmiylashtirib olingan.

Hozirda mazkur holat yuzasidan Jinoyat kodeksining 211-moddasi bilan jinoyat ishi qoʻzgʻatilgan. Gumonlanuvchiga nisbatan “qamoq” ehtiyot chorasi qoʻllangan, tergov davom etmoqda.