“Toshkent” xalqaro aeroportining mahalliy aviaqatnovlar terminalida “Mooz Coffee” kafesi ochildi. Yangi ovqatlanish punkti uchib ketish zalining "steril" hududida joylashgan bo'lib, kechayu kunduz ishlaydi. Qahvaxona menyusida issiq va sovuq ichimliklar, pishiriqlar, shirinliklar, sendvich va salatlar mavjud.

“Toshkent aeroportida filialimizning ochilishiga tayyorgarlik ko‘rar ekanmiz, jo‘nab ketayotgan yo‘lovchilar uchun vaqt va qulaylik eng muhimi ekanligini hisobga oldik. Vaqtni tejash tamoyiliga qat'iy rioya qilgan holda ishlaydigan malakali kadrlarni tanladik, menyuni ham o'zbekistonliklarning, ham xorijlik sayyohlarning didi va ehtiyojlari xilma-xilligini hisobga olgan holda ishlab chiqdik va moslashtirdik, bortga olib chiqish mumkin bo'lgan qulay va xavfsiz idishlarni tanladik. Endi esa katta quvonch bilan yo‘lovchilarni poytaxt aeroportida kutib olishga tayyormiz”, — dedi Mooz Coffee vakili.

Mooz Coffee — Qozog'istondagi mashhur qahvaxonalar tarmog'i. Brendning O‘zbekistondagi rasmiy vakili Comfort Development kompaniyasi bo‘lib, u Toshkent aeroportidagi umumiy ovqatlanish shoxobchasini tashkil etish uchun auksionda g‘olib chiqqan edi.