Foto: Prezident matbuot xizmati

1-noyabrdan boshlab tadbirkorlar uchun barcha mobil toʻlov ilovalari orqali hisob-kitob qilish imkonini beradigan universal QR-kod beriladi. Bu haqda Prezidentning tadbirkorlar bilan oʻtayotgan ochiq muloqotida maʼlum qilindi.

Yillik aylanmasi 1 milliard soʻmgacha boʻlgan barcha tadbirkorlar kelasi yil 1-yanvardan bir xil, yaʼni aylanmadan 1 foiz soliq toʻlashga oʻtkaziladi.

Masalan, hozir aylanmasi 100 million soʻmgacha boʻlgan yakka tadbirkor yillik 12 million soʻmgacha qatʼiy soliq oʻrniga koʻpi bilan 1 million soʻm toʻlaydi. Yoki aylanmasi 100 milliondan 1 milliard soʻmgacha boʻlgan tadbirkor aylanmadan ilgari 30-40 million soʻm soliq toʻlagan boʻlsa, endi uning soliq yuki 3-4 karra kamayadi.

“Umuman, yaratilayotgan sharoitlar orqali yakka tadbirkorlar hisobida yiliga 1 trillion soʻm, tasavvur qilyapsizlarmi, 1 trillion soʻm qolyapti. Bu – kichik biznes uchun qoʻshimcha resurs, yakka tadbirkorlar oʻz biznesini keyingi bosqichga olib chiqishi uchun yana bir imkoniyat”, dedi Prezident.

Oʻtgan hafta 200 dan ortiq toʻqimachilik korxonalari vakillari bilan uchrashilib, sohani qoʻllab-quvvatlash boʻyicha 7 trillion soʻmlik tashabbuslar eʼlon qilindi.

Tez kunlarda toʻqimachilikda “ishonchli eksportchi” dasturi boshlanib, eksport oldi moliyalash tizimi yoʻlga qoʻyiladi va buning uchun 200 million dollar yoʻnaltiriladi.

Bu elektrotexnika, qurilish materiallari, oziq-ovqat, farmatsevtika kabi eksport salohiyati yuqori, lekin imkoniyatlari toʻliq ishga solinmagan sohalar uchun ham joriy etiladi.

Ushbu sohalardagi tadbirkorlarni aylanma mablagʻi uchun 500 million dollar beriladi.

Har bir tarmoqning sifati kafolatlangan, raqobatdosh 10 tadan mahsulotiga “Oʻzbekiston ramzi” sifat belgisini berib, ularni dunyoga tanitish uchun katta targʻibot kampaniyasi boshlanadi.