“Tengiz” – “Eng yaxshi ayol”ni kashf etdi

12:02 05 Dekabr 2022 Madaniyat
689 0

Hamdoʻstlik mamlakatlarining “Moskva premerasi” (Moskovskaya premyera) xalqaro kinofestivalida Oʻzbekiston Respublikasi Kinematografiya agentligi buyurtmasiga binoan rejissyor Mansur Abduxoliqov tomonidan suratga olingan “Tengiz” badiiy filmi “Eng yaxshi aktrisa” nominatsiyasida mukofot bilan taqdirlandi.

Mazkur filmda bir ayolning hayoti, uning atrofidagilar va turmush tarzi haqida hikoya qilinadi. Bundan tashqari, filmda qoraqalpoq xalqining urf-odatlari, madaniyati, Orol dengizining taqdiri, moʻynoqliklar ichki kechinmalari ifodalangan.

Ushbu film, asosan, Qoraqalpogʻistonning Moʻynoq shahrida istiqomat qiluvchi Manzura Yerniyozova va uning jasoratiga bagʻishlanadi. Filmda badiiy toʻqimalar mavjud. Lekin film syujetiga bu ayolning tushkunlikka tushmay tikuvchilikni oʻrganib, tadbirkorga aylangani, yoshlarga ibrat boʻlayotgani, iroda va matonati asos qilib olingan. Baxtsiz hodisa tufayli oʻng oyoq-qoʻlidan ajralgan Tengiz ismli kelinning bir zumda toʻkis koʻringan baxtidan ayrilishi haqidagi voqea bilan boshlansa, filmda kelgusi sahnalar ancha koʻtarinki tus oladi. Toʻgʻri, u sevgan yoridan, baxtidan voz kechadi, lekin oʻzining tirishqoqligi va mehnati tufayli yana hayotga qaytadi.

Film ssenariyi mualliflari Gʻafur Shermuhammad va Shuhrat Rizayev, postanovkachi operator — Dilmurod Turdiboyev.

Rollarda: Sitora Farmonova, Koʻpjursin Allanazarov, Roza Piyazova, Feruza Saidova, Lizaxon Haqnazarova va boshqalar.

Eslatib oʻtamiz, bundan avvalroq mazkur festivalda oʻzbek rejissyori Qamara Kamalova xalqaro kinematografiya hamkorligiga qoʻshgan hissasi uchun faxriy mukofot bilan taqdirlangan edi.

Tavsiya etamiz

Izohlar

Hozircha hech kim fikr bildirmagan. Balki Siz birinchilardan bo'larsiz?