Ҳамдўстлик мамлакатларининг “Москва премераси” (Московская премьера) халқаро кинофестивалида Ўзбекистон Республикаси Кинематография агентлиги буюртмасига биноан режиссёр Мансур Абдухолиқов томонидан суратга олинган “Тенгиз” бадиий фильми “Энг яхши актриса” номинациясида мукофот билан тақдирланди.

Мазкур фильмда бир аёлнинг ҳаёти, унинг атрофидагилар ва турмуш тарзи ҳақида ҳикоя қилинади. Бундан ташқари, фильмда қорақалпоқ халқининг урф-одатлари, маданияти, Орол денгизининг тақдири, мўйноқликлар ички кечинмалари ифодаланган.

Ушбу фильм, асосан, Қорақалпоғистоннинг Мўйноқ шаҳрида истиқомат қилувчи Манзура Ерниёзова ва унинг жасоратига бағишланади. Фильмда бадиий тўқималар мавжуд. Лекин фильм сюжетига бу аёлнинг тушкунликка тушмай тикувчиликни ўрганиб, тадбиркорга айлангани, ёшларга ибрат бўлаётгани, ирода ва матонати асос қилиб олинган. Бахтсиз ҳодиса туфайли ўнг оёқ-қўлидан ажралган Тенгиз исмли келиннинг бир зумда тўкис кўринган бахтидан айрилиши ҳақидаги воқеа билан бошланса, фильмда келгуси саҳналар анча кўтаринки тус олади. Тўғри, у севган ёридан, бахтидан воз кечади, лекин ўзининг тиришқоқлиги ва меҳнати туфайли яна ҳаётга қайтади.

Фильм сценарийи муаллифлари Ғафур Шермуҳаммад ва Шуҳрат Ризаев, постановкачи оператор — Дилмурод Турдибоев.

Ролларда: Ситора Фармонова, Кўпжурсин Алланазаров, Роза Пиязова, Феруза Саидова, Лизахон Ҳақназарова ва бошқалар.

Эслатиб ўтамиз, бундан аввалроқ мазкур фестивалда ўзбек режиссёри Қамара Камалова халқаро кинематография ҳамкорлигига қўшган ҳиссаси учун фахрий мукофот билан тақдирланган эди.