Buyuk Britaniyaning nufuzli “The Guardian” gazetasida “Asr koʻrgazmasi: Oʻzbekistondan Londongacha boʻlgan Ipak yoʻli” sarlavhali maqola eʼlon qilindi, deb xabar bermoqda “Dunyo”AA muxbiri.

Nashrda Britaniya muzeylarida ilk bor VII asrda yaratilgan olti metr uzunlikdagi monumental devoriy surat, shuningdek, VIII asrga oid fil suyagidan yasalgan dunyodagi eng qadimgi shaxmat doskasi kabi Samarqand muzeylari kolleksiyalaridan namunalar namoyish etilishi taʼkidlagan.

Maʼlum qilinishicha, eksponatlar joriy yilning sentyabr oyida ochiladigan koʻrgazma uchun qadimiy Samarqand shahridan Buyuk Britaniyaga yetkaziladi. “Tarixda birinchi marta Oʻzbekiston muzeylaridagi eksponatlar Britaniyaga keltirilmoqda”, deyiladi maqolada.

Qayd etilishicha, ushbu koʻrgazmada 300 dan ortiq eksponatlar 29 ta milliy va xalqaro muassasalar tomonidan taqdim etiladi.

“Tuya, ot va fil minayotgan odamlar tasvirlangan olti metrli devoriy surat Samarqanddagi muzeyning «Elchilar zali”da joylashgan. 660-yillarga oid va 1960-yillarda topilgan ushbu qadimiy surat mintaqada yirik savdogarlar boʻlgan qadimgi soʻgʻdlar tomonidan yaratilgan noyob sanʼat namunasidir», deya taʼkidlagan “The Guardian”.

Maqolada, shuningdek, 2025-yilning fevraliga qadar davom etadigan ushbu koʻrgazma chiptalari yaqin kunlarda sotuvga chiqarilishi xabar qilingan.