Videodan kadr

Ijtimoiy tarmoqlarda Samarqand va Qashqadaryo viloyatlarini bogʻlab turuvchi “Taxtaqoracha” dovonining Kitob tumanidan oʻtgan qismida 3 kundan buyon oʻta yirik yongʻin hodisalari kuzatilayotgani, alangani oʻchirishning imkoni boʻlmayotgani haqida xabarlar tarqaldi. Favqulodda vaziyatlar vazirligi hodisa yuzasidan maʼlumot berdi.

Bildirilishicha, joriy yilning 4-iyul kuni soat 12:08 da Qashqadaryo viloyati Kitob tumani “Qaynar” MFY hududidagi qir adirliklarida quruq oʻt yonayotganligi toʻgʻrisida viloyat FVBga xabar tushgan. Shunga koʻra 2 ta yongʻin-qutqaruv ekipajlari voqea joyiga 13:00 da yetib borib, alangani bartaraf etishga kirishgan. Koʻrilgan choralar natijasida yongʻin soat 16:00 da oʻrab olingan va 17:00 da toʻliq oʻchirilgan.

Ushbu hududda yuz bergan ikkinchi holatda esa yongʻin bugun, 6-iyul kuniga oʻtar kechasi soat 00:20 da sodir boʻlgan.

Hodisa joyiga yongʻin-qutqaruv ekipajlari soat 00:44 da yetib borib, yonayotgan qir-adirliklardagi yongʻinni soat 00:50 da oʻrab olgan va 01:20 da oʻchirishga erishgan.

Taʼkidlanishicha, ushbu yongʻin 3 kundan buyon davom etayotgani yoʻq, balki ikki xil vaqt, boshqa-boshqa kunlarda sodir boʻlgan.