Foto: "Xalq so'zi"

Samarqand tumanidagi Zaxlik qishlogʻida joylashgan suv tozalash inshooti 1965-yilda qurilgan. Oʻz-oʻzidan ayonki, oʻtgan yillar bu inshootning ishlash quvvati va sifatiga sezilarli taʼsir oʻtkazdi, samaradorlik esa pasayib bordi.  Shunga koʻra inshootni bugungi kun talablari asosida modernizatsiya qilish loyihasiga kirishildi.

Inshoot Fransiyaning “SADE” kompaniyasi tomonidan rekonstruksiya qilindi. Qurilish-montaj ishlari shu yilning sentyabr oyi oxirida tugatildi. Shunday qilib, mazkur obyektda zamonaviy skada tizimi joriy etildi. Tozalash jarayoni olti bosqichda amalga oshirilib, suv taqsimoti maxsus texnologiya orqali bajariladi. U bir xil balansda suvni taqsimlash imkonini beradi. Xodimlar faqat texnik koʻriklarni oʻtkazadi. Bu esa ishchi kuchi, vaqt va mablagʻni tejaydi, ish aniq va sifatli olib boriladi.

– Ushbu loyihaning qiymati 12,5 million dollarni tashkil etib, yuqori malakali mutaxassislar tomonidan Yevropa mamlakatlarida ishlab chiqarilgan eng zamonaviy texnologiyalar asosida rekonstruksiya qilindi,– deydi “SADE” kompaniyasi vakili, loyiha kordinatori Jahongir Qodirov. – Inshootda bir kunda 140 ming kub oqova suv tozalanib, Zarafshon daryosiga quyiladi.

Asosiysi, sifatli tozalangan suvlardan qishloq xoʻjaligida, sanoat va iqtisodiyotning boshqa qator tarmoqlarida ham foydalanish mumkin. Bu esa suv tanqisligi ortib borayotgan ayni sharoitda oqilona yondashuvdir.

  Abdulaziz Yoʻldoshev, “Xalq soʻzi”.