Davlatimiz rahbari oʻtgan oy Italiyaga rasmiy tashrifi doirasida mamlakatning aholi soni va maydoni boʻyicha eng yirik hamda iqtisodiy jihatdan peshqadam hududlaridan biri — Lombardiya gubernatori Attilio Fontana bilan uchrashib, keng koʻlamli hamkorlik istiqbollarini muhokama qilgan edi. 

Erishilgan ana shu kelishuvlar doirasida Oʻzbekiston sogʻliqni saqlash vaziri Amrillo Inoyatov Lombardiya sogʻliqni saqlash hududiy vaziri Gvido Bertolaso, shuningdek, “Assolombarda” uyushmasi vakillari bilan videomuloqot qildi. 

Onlayn suhbatda qayd etilganidek, “Assolombarda” Lombardiyaning eng yirik sanoat uyushmasi hisoblanadi. U tibbiyot va biologiya sohalari vakillarini birlashtiruvchi oʻziga xos markaz rolini bajaradi.

Uyushma sogʻliqni saqlash tizimiga doir keng qamrovli tuzilmani oʻz tarkibida jamlagan. Patronaj xizmati, poliklinika, tez tibbiy yordam, reabilitatsiya, ilmiy tadqiqot, nogironligi bor shaxslar va qariyalar bilan ishlash muassasalari shular jumlasidan.

Muloqot davomida Lombardiya sogʻliqni saqlash vaziri hamda “Assolombarda” vakillari quyidagi yoʻnalishda loyihalarni amalga oshirishda  koʻmaklashishga tayyor ekanligini maʼlum qildi: 

— sogʻliqni saqlash sohasida “Lombardiya hududiy modeli”, shuningdek, surunkali kasalliklarni davolash, bemorlar bilan ishlash, ularni tibbiy muolaja qilish, ijtimoiy taʼminot tizimini moliyalashtirish uslublari yuzasidan tajriba almashish;

— yurtimizdagi bir qator tibbiyot muassasalariga sarmoya kiritish;

— kasalliklar profilaktikasi va ularga qarshi kurashish boʻyicha mutaxassislar malakasini oshirish;

— Oʻzbekiston milliy sogʻliqni saqlash tizimini rivojlantirishga koʻmaklashish. 

Maʼlumot uchun: Lombardiya viloyati Italiya yalpi ichki mahsulotining 22 foizini taʼminlaydi va bu koʻrsatkich boʻyicha Yevropa Ittifoqida beshinchi oʻrinni egallaydi.