Koreya Respublikasining poytaxti — Seul shahrida oʻtkazilgan “Sirdaryoda biznes qiling” biznes-forumi doirasida Sirdaryo viloyati delegatsiyasi Koreyaning qator nufuzli kompaniyalari rahbarlari bilan uchrashuvlar oʻtkazdi. Jumladan, Koreya onlayn import va eksport assosiatsiyasi, 3H Korea, Tubestar Co, Arizon, Sysmate, Happy LNB, Gem Nanotechnology, OTTO, Filmax AMP hamda Toytron Co kompaniyalari bilan muzokaralar olib borildi, deb xabar bermoqda Sirdaryo viloyati hokimligi axborot xizmati.

Uchrashuvlar davomida ikki tomonlama manfaatli loyihalarni Sirdaryo viloyati hududida amalga oshirish, investitsiyaviy hamkorlikni yoʻlga qoʻyish va ishlab chiqarish hamda innovatsion yoʻnalishlarda hamkorlik qilish masalalari muhokama etildi.

Shuningdek, bugun viloyat rahbari Erkinjon Turdimov boshchiligidagi delegatsiya aʼzolari “Sun Moon University”da ham boʻlishdi. Unda Guliston shahrida ushbu universitetning filialini tashkil etish masalasi muhokama qilindi.

Sirdaryo viloyati delegatsiyasining Koreya Respublikasiga xizmat safari davom etmoqda.

Ahmadali ShERNAZAROV, “Xalq soʻzi”.