Illyustrativ foto

Sayyohlar uchun Singapurdan Oʻzbekistonga toʻgʻridan-toʻgʻri charter reyslar tashkil etiladi. Bu haqda “Dunyo” axborot agentligi xabar qildi.

Singapurning yetakchi turoperatorlaridan boʻlgan “Chan Brothers Travel” kompaniyasi joriy yilning dekabr oyidan Oʻzbekistonga yuzlab turistlarni olib kelishni rejalashtirmoqda. Ushbu maqsadda Singapurdan Oʻzbekistonga charter parvozlar yoʻlga qoʻyiladi.

Toʻqqiz kunlik tur doirasida Singapur va Osiyo-Tinch okeani mintaqasidagi boshqa mamlakatlardan kelgan sayyohlar Toshkent, Samarqand, Buxoro va Xiva kabi qadimiy shaharlarga tashrif buyuradi. Shuningdek, Oʻzbekistonning boy tarixi, madaniyati, betakror meʼmoriy yodgorliklari, goʻzal tabiati, mahalliy aholining urf-odatlari va milliy taomlari bilan tanishadi.

Charter parvozlarni targʻib qilish maqsadida kompaniya Oʻzbekistonga bagʻishlangan maxsus marketing kampaniyasini boshlaydi.

Shu bilan birga, Singapurda oʻtkaziladigan turistik koʻrgazmalarda Oʻzbekistonning turizm salohiyatiga bagʻishlangan tadbirlar tashkil etiladi.

Taʼkidlash joiz, sayohatchilar bilan Oʻzbekistonga Singapurning xitoy va malay tillaridagi mashhur radioboshlovchilari ham tashrif buyurishadi.