Denov tumani hokimining oʻrinbosari Akbarali Ishmurzoyev Surxondaryo viloyatining Shoʻrchi tumaniga hokim etib tayinlandi.

Viloyat hokimligi matbuot xizmatining xabar berishicha, bugun Shoʻrchi tumanida xalq deputatlari tuman Kengashining navbatdan tashqari sessiyasi oʻtkazildi. Unda Surxondaryo viloyati hokimi Ulugʻbek Qosimov ishtirok etib, Shoʻrchi tumanini ijtimoiy-iqtisodiy rivojlantirish borasida olib borilayotgan ishlar, erishilgan natijalar hamda yoʻl qoʻyilgan kamchiliklarga toʻxtaldi.

Viloyat rahbari shu vaqtga qadar tuman hokimi vazifasida ishlab kelgan Ulugʻbek Zokirov boshqa ishga oʻtishi munosabati bilan lavozimidan ozod etilganligini bildirib, Akbarali Ishmurzoyev nomzodini Shoʻrchi tumani hokimi etib tayinlash taklifini bildirgan. Nomzod deputatlar tomonidan bir ovozdan maʼqullangan.

Maʼlumot uchun, Ishmurzoyev Akbarali Abdujabborovich 1982-yilda Denov tumanida tugʻilgan. 2003 – 2009-yillarda Termiz davlat universitetini tamomlagan.

Faoliyati davomida ijro hokimiyati organlarida turli lavozimlarda, xususan, Uzun va Angor tumani hokimining oʻrinbosari vazifasida mehnat qilgan. Tayinlovga qadar A.Ishmurzoyev 2023-yildan buyon Denov tumani hokimining qurilish, kommunikatsiyalar, kommunal xoʻjalik, ekologiya va koʻkalamzorlashtirish masalalari boʻyicha oʻrinbosari vazifasida faoliyat yuritib kelayotgan edi.