Денов тумани ҳокимининг ўринбосари Акбарали Ишмурзоев Сурхондарё вилоятининг Шўрчи туманига ҳоким этиб тайинланди.

Вилоят ҳокимлиги матбуот хизматининг хабар беришича, бугун Шўрчи туманида халқ депутатлари туман Кенгашининг навбатдан ташқари сессияси ўтказилди. Унда Сурхондарё вилояти ҳокими Улуғбек Қосимов иштирок этиб, Шўрчи туманини ижтимоий-иқтисодий ривожлантириш борасида олиб борилаётган ишлар, эришилган натижалар ҳамда йўл қўйилган камчиликларга тўхталди.

Вилоят раҳбари шу вақтга қадар туман ҳокими вазифасида ишлаб келган Улуғбек Зокиров бошқа ишга ўтиши муносабати билан лавозимидан озод этилганлигини билдириб, Акбарали Ишмурзоев номзодини Шўрчи тумани ҳокими этиб тайинлаш таклифини билдирган. Номзод депутатлар томонидан бир овоздан маъқулланган.

Маълумот учун, Ишмурзоев Акбарали Абдужабборович 1982 йилда Денов туманида туғилган. 2003 – 2009 йилларда Термиз давлат университетини тамомлаган.

Фаолияти давомида ижро ҳокимияти органларида турли лавозимларда, хусусан, Узун ва Ангор тумани ҳокимининг ўринбосари вазифасида меҳнат қилган. Тайинловга қадар А.Ишмурзоев 2023 йилдан буён Денов тумани ҳокимининг қурилиш, коммуникациялар, коммунал хўжалик, экология ва кўкаламзорлаштириш масалалари бўйича ўринбосари вазифасида фаолият юритиб келаётган эди.