Arxiv foto

Qirq yoshdan keyin sogʻlom turmush tarzini boshlash ayollarda qarishni kechiktirishi mumkin. Bu haqda ispaniyalik diyetolog Barbara Munar “La Razon” nashriga bergan intervyusida aytib oʻtdi.

Mutaxassisning soʻzlariga koʻra, qarish jarayonlarining atigi 20 foizi genetika bilan belgilanadi, qolgan 80 foizi turmush tarziga bogʻliq. Yaʼni ovqatlanish, jismoniy faollik, uyqu sifati, stress darajasi, boshqalar bilan muloqot qilish sifati va oʻzini oʻzi qadrlash kabilar bu jarayonda muhim ahamiyatga ega.

Shu oʻrinda Munar ayollarning qarishi erkaklarning qarishidan farq qilishini taʼkidladi.

“Ayollar afzalliklarga ega — X xromosomalarida hujayralar yangilanishi va kasalliklardan himoya qilish uchun masʼul boʻlgan koʻproq genlar mavjud. Estrogenlar (ayol jinsiy gormonlari) hayotning muhim qismida «himoyachi” rolini oʻynaydi. Bundan tashqari, ayollar, qoida tariqasida, oʻzlariga yaxshi gʻamxoʻrlik qilishadi», — deydi diyetolog.

Shu oʻrinda Shifokor 40 yoshdan keyin organizmda sezilarli oʻzgarishlar sodir boʻlishini tushuntirdi. Yaʼni gormonlar darajasi pasayadi, metabolizm susayadi, yogʻ tarqalishi oʻzgaradi va mushak massasi kamayadi. Diyetologning soʻzlariga koʻra, ushbu davrda turmush tarzingizni qayta koʻrib chiqish ayniqsa muhimdir — yosh inqiroziga javoban emas, balki kelgusi yillar davomida sogʻligʻingizni mustahkamlash imkoniyati sifatida.

Bu jarayonda ovqatlanishga alohida eʼtibor berish muhim ahamiyatga ega. Gormonlar darajasini tartibga solish va yurak-qon tomir kasalliklari xavfini kamaytirish uchun mushak massasini va sogʻlom yogʻlarni ushlab turish uchun protein miqdorini oshirish zarur. Mutaxassis, shuningdek, glyukoza darajasini barqarorlashtirish uchun shirinliklarni cheklashni maslahat berdi, meva, sabzavot va don mahsulotlariga ustunlik berishni tavsiya qildi.

“Yaxshi xabar shundaki, oqilona yondashuv bilan natijalar tezda sezilarli boʻladi”, — deb xulosa qiladi mutaxassis.