2025-yil 20-noyabr kuni Oliy Majlis Senatining Mudofaa va xavfsizlik masalalari qoʻmitasi raisi Qutbiddin Burxonov “Mintaqaviylik va barqarorlik: global oʻzgarishlar sharoitlarida Markaziy Osiyoda xavfsizlikni taʼminlash” mavzusida Oʻzbekiston Respublikasi Harbiy xavfsizlik va mudofaa universitetida oʻtkazilgan xalqaro ilmiy-nazariy konferensiyada ishtirok etdi.

Konferensiya ishida 100 dan ortiq tashkilot va davlatlarning vakillari, oliy harbiy taʼlim muassasalari ekspertlari, shuningdek, Oʻzbekistonning yetakchi oliy taʼlim hamda tadqiqot muassasalari vakillari va ommaviy axborot vositalari xodimlari ishtirok etdi.

Senator oʻz maʼruzasida global miqyosdagi geosiyosiy jarayonlar sharoitida mintaqa davlatlari oldida turgan vazifalar, xavfsizlik tizimida xalqaro hamkorlikni kuchaytirish, oʻzaro ishonchni mustahkamlash va mintaqaviy barqarorlikning uzoq muddatli istiqbollari haqida fikr yuritdi.

Shuningdek, soʻzga chiqqanlar Oʻzbekistonning Markaziy Osiyoda tinchlik, barqarorlik va yaxshi qoʻshnichilik tamoyillarini mustahkamlash borasidagi tashabbuslarini alohida qayd etdi.

Anjumanda global va regional xavfsizlik tizimida xalqaro tashkilotlarning oʻrni, shuningdek, Markaziy va Janubiy Osiyoda barqarorlikni mustahkamlashda mintaqaviy hamkorlikning dolzarbligi yuzasidan maʼruzalar eshitildi.

Konferensiya yakunida ekspertlar doirasida oʻtkazilgan fikr almashinuvi natijalari asosida mintaqada xavfsizlik siyosatini yanada takomillashtirish, yangi ilmiy-amaliy tashabbuslarni ilgari surish, qoʻshma tadqiqotlarni rivojlantirish va xalqaro hamkorlik mexanizmlarini mustahkamlash boʻyicha bir qator taklif va tavsiyalar ishlab chiqildi.