Oʻzbekiston Respublikasi Oliy Majlisi Senatining Byudjet va iqtisodiy masalalar qoʻmitasi raisi E. Gadoyev Buxoro viloyatida boʻlib, Senatning oʻn birinchi yalpi majlisida koʻrib chiqilgan masalalar va maʼqullangan qonunlarning mazmun-mohiyatini jamoatchilikka yetkazish maqsadida navbatdagi uchrashuvni oʻtkazdi.

Maʼlumki, joriy yil 31-oktyabr – 1-noyabr kunlari boʻlib oʻtgan yalpi majlisda senatorlar 15 ta masalani, jumladan 14 ta qonunni batafsil muhokama qilgan edi. Tashkil etilgan senator uchrashuvida ushbu qonunlarning ahamiyati, ularning ijrosini taʼminlashda mahalliy Kengashlar hamda jamoatchilikning oʻrni yuzasidan fikr almashildi.

Tadbirda viloyat va Buxoro shahar Kengashlari deputatlari, Kengash kotibiyatlari mutaxassislari, yoshlar maslahati guruhi aʼzolari, shuningdek ommaviy axborot vositalari vakillari ishtirok etdi.

Uchrashuv chogʻida mamlakatda iqtisodiy oʻsishni qoʻllab-quvvatlash, mahalliy boshqaruv tizimini takomillashtirish va yoshlarning jamiyatdagi faolligini oshirish kabi bir qator ustuvor yoʻnalishlar muhokama qilindi.

Shuningdek, Senat yalpi majlisida maʼqullangan qonunlarni hududlarda samarali amalga oshirish, aholi turmush darajasini oshirish hamda hududlarni barqaror rivojlantirishga qaratilgan amaliy takliflar ilgari surildi.