Ўзбекистон Республикаси Олий Мажлиси Сенатининг Бюджет ва иқтисодий масалалар қўмитаси раиси Э. Гадоев Бухоро вилоятида бўлиб, Сенатнинг ўн биринчи ялпи мажлисида кўриб чиқилган масалалар ва маъқулланган қонунларнинг мазмун-моҳиятини жамоатчиликка етказиш мақсадида навбатдаги учрашувни ўтказди.

Маълумки, жорий йил 31 октябрь – 1 ноябрь кунлари бўлиб ўтган ялпи мажлисда сенаторлар 15 та масалани, жумладан 14 та қонунни батафсил муҳокама қилган эди. Ташкил этилган сенатор учрашувида ушбу қонунларнинг аҳамияти, уларнинг ижросини таъминлашда маҳаллий Кенгашлар ҳамда жамоатчиликнинг ўрни юзасидан фикр алмашилди.

Тадбирда вилоят ва Бухоро шаҳар Кенгашлари депутатлари, Кенгаш котибиятлари мутахассислари, ёшлар маслаҳати гуруҳи аъзолари, шунингдек оммавий ахборот воситалари вакиллари иштирок этди.

Учрашув чоғида мамлакатда иқтисодий ўсишни қўллаб-қувватлаш, маҳаллий бошқарув тизимини такомиллаштириш ва ёшларнинг жамиятдаги фаоллигини ошириш каби бир қатор устувор йўналишлар муҳокама қилинди.

Шунингдек, Сенат ялпи мажлисида маъқулланган қонунларни ҳудудларда самарали амалга ошириш, аҳоли турмуш даражасини ошириш ҳамда ҳудудларни барқарор ривожлантиришга қаратилган амалий таклифлар илгари сурилди.