Temur ESHBOYEV/“Xalq soʻzi”. Navoiy davlat Pedagogika instituti, Navoiy davlat Konchilik va texnologiyalar universiteti hamda Samarqand Iqtisodiyot va servis instituti hamkorligida Sarmishsoy darasida “Yoshlar turizmi: milliy madaniyat va etnosport” mavzusida yoshlar turizm festivali tashkil etildi.

Ikki kun davom etgan festival doirasida talabalar tomonidan milliy kuy-qoʻshiqlar ijro etildi, arqon tortish, chillak kabi xalqona bellashuvlar, psixologik treninglar va intellektual oʻyinlar oʻtkazildi.

— Sarmishsoy deganda koʻpchilik dam olib, xordiq chiqaradigan soʻlim bir manzilni koʻz oldiga keltiradi, — deydi NavDPI prorektori Xurshid Qurbonov. — Vaholanki, dara uzoq oʻtmishda makon tutgan, ajdodlarimizning ming-ming yillik anʼanalari va urf-odatlaridan hikoya qiluvchi ochiq osmon ostidagi muzey hamdir.

Talaba yoshlar Sarmishsoy darasiga sayohat qilish bilan birga qadimiy Nur qalʼasi, Nurota tumanining “Chashma” tarixiy-meʼmoriy majmuasini hamda Navoiy davlat pedagogika instituti tuzilmasidagi Qatagʻon qurbonlari xotirasi muzeyida boʻlishdi. Tadbir doirasida oliygohlar yoshlar boshlangʻich tashkiloti yetakchilari oʻrtasida hududlarning sayyohlik salohiyatini targʻib etish boʻyicha memorandum imzolandi.