Темур ЭШБОЕВ/«Халқ сўзи». Навоий давлат Педагогика институти, Навоий давлат Кончилик ва технологиялар университети ҳамда Самарқанд Иқтисодиёт ва сервис институти ҳамкорлигида Сармишсой дарасида «Ёшлар туризми: миллий маданият ва этноспорт» мавзусида ёшлар туризм фестивали ташкил этилди.

Икки кун давом этган фестиваль доирасида талабалар томонидан миллий куй-қўшиқлар ижро этилди, арқон тортиш, чиллак каби халқона беллашувлар, психологик тренинглар ва интеллектуал ўйинлар ўтказилди.

— Сармишсой деганда кўпчилик дам олиб, хордиқ чиқарадиган сўлим бир манзилни кўз олдига келтиради, — дейди НавДПИ проректори Хуршид Қурбонов. — Ваҳоланки, дара узоқ ўтмишда макон тутган, аждодларимизнинг минг-минг йиллик анъаналари ва урф-одатларидан ҳикоя қилувчи очиқ осмон остидаги музей ҳамдир.

Талаба ёшлар Сармишсой дарасига саёҳат қилиш билан бирга қадимий Нур қалъаси, Нурота туманининг «Чашма» тарихий-меъморий мажмуасини ҳамда Навоий давлат педагогика институти тузилмасидаги Қатағон қурбонлари хотираси музейида бўлишди. Тадбир доирасида олийгоҳлар ёшлар бошланғич ташкилоти етакчилари ўртасида ҳудудларнинг сайёҳлик салоҳиятини тарғиб этиш бўйича меморандум имзоланди.