YUNESKO Bosh konferensiyasining 43-sessiyasi oʻtkazilishi munosabati bilan Samarqandga kirish yoʻllari vaqtinchalik yopiladi. Bu haqda Ichki ishlar vazirligi matbuot xizmati xabar bermoqda.

Maʼlum qilinishicha, tadbir joriy yilning 30-oktyabridan 14-noyabrigacha boʻlib oʻtadi, shu munosabat bilan shaharda transport harakatiga vaqtinchalik cheklovlar joriy etilishi rejalashtirilmoqda.

Shu bilan birga, vazirlik shaharga faqat ayrim kirish yoʻllari yopilishini, tez yordam mashinalari, FVV maxsus texnikalari va tezkor xizmatlar uchun istisno tariqasida kirish ochiq boʻlishini taʼkidlagan.

Maʼlumotga koʻra, mazkur davr mobaynida shaharga faqat maxsus ruxsatnoma bilan kirish mumkin boʻladi. Tranzit yoʻnalishlarda harakatlanuvchi transport vositalari uchun aylanma yoʻllar tashkil etilgan.

Haydovchilarga maxsus QR-kodli flayerlar tarqatiladi — ular orqali aylanma yoʻllar xaritasini koʻrish mumkin boʻladi.

Idora fuqarolarni sayohatlarni rejalashtirishda oʻzgarishlarni hisobga olishga va vaqtinchalik noqulayliklarga tushunish bilan munosabatda boʻlishga chaqirgan.