Foto: Халқ сўзи

Samarqand shahrida Universitet xiyoboni va Alisher Navoiy koʻchasi boʻylab 14-yanvar Vatan himoyachilari kuni oldidan “Mening armiyam – mening faxrim!” shiori ostida besh ming qadam yurish marafoni oʻtkazildi.

Tadbir avvalida Samarqand viloyat hokimi oʻrinbosari Rustam Qobilov, Oʻzbekiston Yozuvchilar uyushmasi raisi birinchi oʻrinbosari, Mudofaa vazirligi huzuridagi Jamoatchilik kengashi aʼzosi Nodir Jonuzoq, Oliy Majlis Senati aʼzosi Farmon Toshev barchani yaqinlashayotgan bayram bilan qutladilar.

Marafonda 500 nafarga yaqin ishtirokchi belgilangan masofani bosib oʻtib, ochiq maydonda badantarbiya qildi. Eʼtiborlisi, marafonda 86 yoshli otaxon ham qatnashdi.

— Bunday tadbirlarni koʻproq tashkil qilib turish kerak, — deydi Faxriddin bobo Hamidov. — Keksayganda kuchdan qolib, xasta boʻlmaslik uchun har kuni badantarbiya mashqlarini bajarish lozim. Men shunga amal qilib, kam boʻlmayapman.

Bu kabi tadbirlar viloyat boʻylab davom etmoqda.