Foto: Xalq so‘zi

Xabaringiz bor, kuni kecha yurtimiz boʻylab Ichki ishlar vazirligi tashabbusi bilan «Xavfsiz hayot uchun» shiori ostida velo va piyoda yurish marafoni yuqori saviyaga oʻtkazildi.

Samarqand shahridagi «Buyuk ipak yoʻli» xalqaro turizm markazida boʻlib oʻtgan marafonda viloyat ichki ishlar boshqarmasi xodimlari bilan birga barcha huquqni muhofaza qilish organlari, sportchilar, nuroniylar va koʻngilli yoshlardan iborat 4 mingdan ortiq kishi ishtirok etdi.

Jinoyatchilik va huquqbuzarliklarning oldini olish, yoʻllarda xavfsizlikni, jumladan, bolalar oʻlimi bilan bogʻliq yoʻl-transport hodisalarini oldini olishga qaratilgan marafon bir oy davom etadi. Tadbir doirasida aholi oʻrtasida sogʻlom turmush tarzini keng targʻib etish va yoshlarni vatanparvarlik ruhida tarbiyalash maqsadida qator tadbirlar uyushtiriladi.

Velo va piyoda yurish marafonida faol ishtirok etganlarga Samarqand viloyat hokimligi va ichki ishlar boshqarmasi tashakkurnomalari hamda esdalik sovgʻalari topshirildi.

Abdulaziz YOʻLDOSHEV, «Xalq soʻzi».