Foto: “Xalq soʻzi”

Oʻzbekiston va Xitoyning madaniy va tarixiy merosiga bagʻishlangan ushbu koʻrgazmada Samarqand arxeologiya instituti, “Samarqand” davlat muzey-qoʻriqxonasi va Xanchjoudagi Xitoy milliy ipak muzeyiga tegishli 86 ta buyum namoyish etilyapti.

Joriy yil Xitoy milliy ipak muzeyida XIX Osiyo oʻyinlari munosabati bilan “Rang-barang Osiyo: Osiyo liboslari koʻrgazmasi” boʻlib oʻtgan edi. Unda Oʻzbekiston Madaniyat va sanʼatni rivojlantirish jamgʻarmasi mahalliy jamoatchilikka mamlakatimiz muzeylarida saqlanayotgan 20 ta eksponatni taqdim etgan edi. Samarqand koʻrgazmasida Xitoy milliy ipak muzeyi 26 ta namoyish ashyosini havola etyapti. Ushbu koʻrgazmaga tashrif buyuruvchilar Sin sulolasi davriga oid ipak namunalari, suratli gazlama toʻqish dastgohi, liboslar va shoyi mahsulotlarini koʻzdan kechirish imkoniyatiga ega boʻladi.

Jumladan, unda miloddan avvalgi II va milodiy IV asrga oid Afrosiyob xarobalariga tegishli noyob terakota haykalchalari, VIII-XI asrlarga taalluqli sopol buyumlar, Toshkent viloyati Munchoqtepa qishlogʻida olib borilgan qazishmalarda topilgan shisha va bronza buyumlari oʻrin olgan.

Koʻrgazma 2024-yilning 15-sentyabriga qadar davom etadi.

Abdulaziz Yoʻldoshev, “Xalq soʻzi”.